Greint var frá því nýlega að Harry bretaprins væri að gefa út æviágrip sín í bók. Þegar greint var frá útgáfu bókarinnar var Piers Morgan, fyrrum þáttastjórnandi Good Morning Britain, ekki lengi að tjá sig um útgáfuna.

Það kemur eflaust fáum á óvart að Morgan hafi látið Harry heyra það vegna bókarinnar þar sem hann hefur undanfarna mánuði gert lítið annað en að hrauna yfir Harry og eiginkonu hans, Meghan Markle.

„Þú hlýtur að vera að fokking djóka?????“ sagði Morgan á Twitter um leið og fréttir af bókinni voru birtar. Morgan lét svo tvo hlægjandi hláturkalla fylgja með þessum orða en lét það þó ekki nægja. Í dag birti hann pistil í Daily Mail þar sem hann urðar yfir Harry. Harry var lýst sem einni „áhugaverðustu og áhrifamestu manneskju síns tíma“ í yfirlýsingu frá útgefanda bókarinnar en það fór illa í Morgan.

„Þegar ég hugsa um áhugaverðustu og áhrifamestu manneskjur míns tíma hugsa ég um Nelson Mandela, Muhammad Ali, Steve Jobs, Marie Curie,“ segir Morgan í pistlinum. „Ég hugsa ekki um ofdekraðan, sjálfumglaðan, hræsnara sem var fæddur inn í gríðarleg forréttindi,“ segir hann svo og bætir við að Harry sé ekki með neina hæfileika. „Fyrir utan að gjörsamlega rústa konunglegri stöðu sinni fyrir peninga með því að ráðast stanslaust á stofnunina sem gerði hann að því sem hann er.“