Fyrirsætan Kate Moss ákvað að sýna heiminum hvernig hún er í rúminu með myndbandi sem er til sölu sem svokallað NFT. Myndbandið var selt fyrir rúmar 2 milljónir í íslenskum krónum en ágóðin fór til góðgerðarmála.

Fyrirbærið NFT stendur fyrir „non-fungible token“ en blaðamaðurinn Atli Fannar Bjarkason útskýrði á vef RÚV á mjög einföldu máli hvað NFT er. „Einstakt, stafrænt skírteini,“ segir Atli um fyrirbærið sem hefur verið að vekja töluverða athygli að undanförnu. „Áður en lengra er haldið vil ég að það sé á hreinu að það er mjög eðlilegt að finnast þetta vera algjört rugl. Þetta er algjört rugl. NFT var varla til fyrir tveimur árum en veltir í dag milljörðum fyrir tilstilli fólks sem á augljóslega of mikið af peningum.“

Góðgerðarsamtökin Gurls Talk, sem berjast fyrir geðheilbrigði, fengu Kate Moss í lið með sér til að gera myndband sem síðar var selt sem NFT. Myndbandið ber nafnið „Sleeping with Kate“ og eins og nafnið gefur til kynna er Kate sofandi í myndbandinu. Myndbandið var sett á uppboð en hart var barist um að eiga það. Þegar talað er um að eiga myndbandið er átt við að eigandinn á þá skírteini sem staðfestir eignarhaldið á myndbandinu – þó svo að myndbandið sé opið öllum til áhorfs.

Ljóst er að einhverjum þótti þetta skírteini vera verðmætt en það seldist á endanum fyrir rúmlega 17.456 bandaríska dollara, eða um 2,1 milljón í íslenskum krónum. Hægt er að sjá myndbandið sem um ræðir á uppboðssíðunni þar sem það var selt.