Fyrirsætan Sif Saga Dagbjartsdóttir hefur verið á forsíðum glanstímarita á borð við Elle og Harper’s Bazaar. Hún sat fyrst fyrir sextán ára en sama ár fékk hún flog eftir mjög slæmt kvíðakast. Sif er fædd og uppalin í Boston, en á íslenska foreldra og stóra fjölskyldu á Íslandi.
Sif opnar sig um tíma sinn í heimavistarskóla, fyrirsætubransann og kvíða í einlægu viðtali í helgarblaði DV.
Sif hefur fundið fyrir mikilli pressu frá bransanum um útlit sitt og fékk hörð viðbrögð þegar hún mætti til vinnu með hormónaútbrot.
„Ég hef fundið fyrir pressu varðandi hvernig ég eigi að klæða mig og hafa hárið, en hef mest fundið fyrir henni þegar kemur að húðinni á mér. Ég fékk hormónaútbrot fyrir tveimur árum og það hafði mikil áhrif á vinnuna. Það var rosalega erfitt, bókarar hringdu í mig og öskruðu á mig, eins og þetta væri eitthvað sem ég hefði gert við sjálfa mig. Ég man að einhver sagði við mig að ég myndi aldrei fá vinnu aftur. Þetta var allt svo dramatískt,“ segir Sif, sem hefur öðlast mikla innri ró í gegnum sjálfsvinnu.
„Líka með vigtina. Um tíma var ég á kvíðalyfjum sem ollu því að ég þyngdist, en það var bara vökvi vegna lyfjabjúgs. Ég sjálf tók ekki eftir því en fékk að heyra: „Hvað í fjandanum kom fyrir þig?“ Ég man að ég skildi ekkert hvað væri í gangi. Ég var spurð um hvað ég væri að borða og hvað ég væri að gera, en það kom í ljós að þetta væru töflurnar. Ég hef síðan þá lært inn á líkamann minn en sem betur fer hefur pressan um að vera grönn minnkað mikið undanfarin ár.“
Þú getur lesið viðtalið í heild sinni í nýjasta tölublaði DV.
