Afar sérstakri ljósmynd var deilt á samfélagsmiðlum í morgun en það var Steinunn Þóra Árnadóttir alþingiskona sem birti færslu sem hefur kætt marga af viðbrögðum að dæma.
Hófst þetta allt með sérkennilegu hljóði, að sögn Steinunnar, sem kom frá baðherberginu á heimili hennar og Stefáns Pálssonar, eiginmanns hennar og sagnfræðings. Oft er talið að þegar byrjar að flæða upp úr klósetti fylgi því gífurleg hreinlætismartröð en raunin var ekki sú hjá þeim hjónum og við nánari skoðun kom í ljós aðstaða sem þótti óvenjulega hrein.
„Við eftirgrennslan kom í ljós að við eigum mjög hreint klósett,“ skrifar Steinunn og slær á létta strengi en felur þó ekki undrun sína. „Hvaðan sápan kemur er óljósara.“
Stefán bætir þá við færslu hennar og segir að orsökin séu stífla í frárennslinu í stigagangi hússins.
Færsluna má sjá að neðan, en sagnfræðingurinn lofar að málið verði uppfært í þræði færslunnar.