Þáttastjórnandinn frægi James Corden talaði kollega sinn Bill Maher til fyrir að hvetja til fitusmánunar.

Maher hafði hvatt til fitusmánunar í þætti sínum Real Time. Í þættinum sagði hann að fitusmánun þyrfti að snúa aftur, því þá væri fólk í yfirþyngd líklegra til að taka sig á.

Corden gagnrýndi Maher í einlægu innleggi í þætti sínum The Late Late Show, en hann ræddi meðal annars um eigin baráttu við að vera í yfirþyngd.

„Þú vinnur gegn málstaðnum. Það hefur verið sannað að fitusmánun leiðir einungis til þess að fólk skammist sín, og skömm leiðir til þunglyndis, kvíða og sjálfseyðingarhvata.“

Corden sagði að lausnin fælist frekar í því að gera hollan mat og heilbrigðisþjónustu aðgengilegri, ásamt því að gott væri að fræða fólk um þessi mál.

Þetta innlegg Corden má sjá hér að neðan.