Söngkonan Jóhanna Guðrún Jónsdóttir og eiginmaður hennar, tónlistarmaðurinn Davíð Sigurgeirsson, eiga von á sínu öðru barni. Fyrir eiga hjónin stúlku sem fædd er árið 2015 og er mikil eftirvænting hjá litlu fjölskyldunni fyrir væntanlegum fjölskyldumeðlimi. 

Jóhanna Guðrún var í sviðsljósinu á lokakvöldi undankeppni Ríkisútvarpsins, 2. mars síðastliðinn, fyrir Eurovision-keppnina sem fram fer í Ísrael í maí. Tók söngkonan lagið Is it true, sem heillaði heimsbyggðina fyrir tíu árum og lenti í öðru sæti Eurovision-keppninnar. Frammistaða Jóhönnu Guðrúnar var stórbrotin og í enn eitt skiptið minnti hún á sig sem ein besta söngkona sem Ísland hefur alið. Þó duldist fáum að Jóhanna Guðrún var kona ekki einsömul.

Jóhanna Guðrún og Davíð gengu í hjónaband þann 21. september á síðasta ári og því er skammt stórra högga á milli hjá parinu. Þau hafa unnið saman að tónlistarsköpun auk þess sem parið treður reglulega upp ásamt valinkunnum hljóðfæraleikurum. Þá stýra þau saman barnakór Vídalínskirkju við góðan orðstír.

Eins og áður segir er Jóhanna Guðrún ein þekktasta söngkona landsins en færri vita að Davíð er einn af frambærilegustu gítarleikurum landsins. Hann á ekki langt að sækja hæfileikana því faðir hans er gítargoðsögnin Sigurgeir Sigmundsson sem hefur leikið í hljómsveitunum Start, Gildrunni og Drýsli.