Jóhannes Haukur Jóhannesson fer með hlutverk í spennutryllinum The Good Liar og sést til leikarans í miðjum hasar í glænýrri stiklu fyrir myndina. Sjá stórleikararnir Helen Mirren og Ian McKellen um burðarrullurnar.
The Good Liar er byggð á samnefndri skáldsögu eftir Nicholas Searle og skrifuð af handritshöfundi Mr. Holmes, þar sem Ian McKellen fór einnig með aðalhlutverkið. Að þessu sinni leikur McKellen glæpamann sem ætlar að setjast í helgan stein eftir eitt lokasvindl. Áætlunin er að vinna sér inn traust dularfullrar ekkju og stela peningum hennar, en stigmagnandi vefur lyga reynist hafa ófyrirsjáanleg áhrif á þau bæði.
Myndinni er leikstýrt af Óskarsverðlaunahafanum Bill Condon, leikstjóra Chicago, Dreamgirls og Beauty and the Beast. Tökur á myndinni eru hafnar og fara að mestu fram í Bretlandi, en einnig í Þýskalandi. Condon er einnig einn framleiðandi myndarinnar og hefur áður unnið með McKellen að myndunum Mr. Holmes og Gods and Monsters, en Condon vann Óskarsverðlaun fyrir árið 2000 í flokki besta handrits byggðu á áður útgefnu efni. Leikstjórinn naut einnig mikillar velgengni með lokamyndum Twilight-seríunnar og halaði Beauty and the Beast inn rúman milljarð í Bandaríkjadölum á heimsvísu.
The Good Liar er væntanleg í kvikmyndahús í vetur.
