Það ganga ekki allar hetjur með skikkjur en fréttamaðurinn Bogi Ágústsson kom fjölskyldu til bjargar í miðbæ Reykjavíkur nú á dögunum. Á Facebook-síðu sinni birti hann myndbandssyrpu þar sem hann sést fylgja andafjölskyldu frá höfninni yfir Mýrargötu, Tryggvagötu, Pósthússtræti, Kirkjutorg og Templarasund.
Áfangastaður ferðalagsins var að sjálfsögðu Reykjavíkurtjörn en á samskiptamiðlinum þakkar Bogi ónefndri franskri konu sem hjálpaði til með fylgdina. Ljóst var einnig að ýmsir vegfarendur fylgdust með þessu góðverki fréttamannsins. Bogi skrifar á Facebook:
„Happy ending. Lofaði að láta þá sem fylgdust með röltinu um miðbæ Reykjavíkur vita hvernig ferðalagið endaði. Hér má sjá lokin á ferðalagi andamömmu með þrjá unga frá höfninni.“
Fylgdin endaði vel og má sjá syrpuna hér að neðan. Í einu myndbrotinu segir hann: „Þetta er búið að vera langt og mikið ferðalag.“