Borgarleikhúsið frumsýndi í dag fyrsta lagið úr söngleiknum Matthildur, sem frumsýndur verður á Stóra sviðinu í mars.

Lagið heitir Er ég verð stór og er í flutningi leikarahópsins.

Söngleikurinn Matthildur er byggður á samnefndi bók Roald Dahl. Stúlkan Matthildur er óvenju gáfuð, tilfinninganæm og bókelsk og líklega þess vegna með sérlega ríkt ímyndunarafl.

Foreldrar hennar eru hins vegar fáfróð og óhefluð, og skólastjórinn Karítas Mínherfa er hreinasta martröð. Matthildur lumar þó á ýmsum ráðum gegn heimsku fólksins og með styrk sínum og hugrekki tekst henni að vinna sér sess í veröldinni.

Þetta er fræg saga um litla stúlku sem þróar með sér ofurkrafta í baráttunni við ranglæti heimsins.

Með aðalhlutverk í verkinu fara Björgvin Franz Gíslason, Katrín Halldóra Sigurðardóttir, Arnar Dan Kristjánsson, Vala Kristín Eiríksdóttir, Björn Stefánsson og Ebba Katrín Finnsdóttir. Þær Erna Tómasdóttir, Ísabel Dís Sheehan og Salka Ýr Ómarsdóttir skipta með sér hlutverki Matthildar.