Kanadíska hljómsveitin Arcade Fire hefur boðað komu sína til Íslands í fyrsta sinn og verður með tónleika í Laugardalshöllinni þann 21. ágúst næstkomandi.

Þetta kemur fram í fréttatilkynningu frá Þorsteini Stephensen, eiganda Hr. Örlygs, en miðasala á tónleikana hefst á þriðjudaginn 17. apríl.

Í tilkynningunni segir Þorsteinn að þetta verði einstök upplifun. „Ekki nóg með það að þetta sé mögnuð tónleikasveit, þá eiga þau svo mörg góð lög og höfða til svo breiðs hóps.”

Þetta verða síðustu tónleikarnir á Everything Now tónleikaferðalaginu þeirra og þau munu hljómsveitarmeðlimir nota tækifærið og ferðast um Ísland í kjölfarið.

Allt frá útgáfu fyrstu plötunnar, Funeral frá árinu 2004, hefur hljómsveitin skipað sér sess með fremstu rokkböndum heims. Upp frá því hefur hún þróað hljóm sinn með fjórum plötum til viðbótar; Neon Bible, The Suburbs, Reflektor og Everything Now sem gefin var út á síðasta ári, en allar þessar plötur hafa verið tilnefndar til Grammy-verðlauna í flokknum Best Alternative Music Album. Áhrif hljómsveitarinnar Arcade Fire eru raunar slík að hún hefur meðal annars verið kölluð „bjargvættur indírokks“ af The Guardian.

„Ég ætla að leyfa mér að spá að þetta verði einhverjir þeir bestu tónleikar sem nokkurn tímann hafa verið haldnir á Íslandi,” bætir Þorsteinn við.

Hér fyrir neðan má sjá upptöku af Arcade Fire flytja lagið Everything Now af samnefndri plötu: