Orðið á götunni er að stjórnmálamönnum hætti stundum til að fela sannleikann, alltént leggi ekki mikið á sig til að upplýsa um hann að óþörfu ef það þjónar ekki þeirra hagsmunum.

Svandís Svavarsdóttir, heilbrigðisráðherra, skrifar í Morgunblaðið í vikunni um niðurstöður samantektar á þróuninni á þjónustu heilsugæslustöðva milli áranna 2014 -2019.

Yfirskriftin er „traust heilsugæsla“ og ber Svandís mikið lof á heilsugæslustöðvarnar sem hafi bætt aðgengi sitt og þjónustu.

Hún vitnar einnig í þjónustukönnun sem Maskína gerði fyrir Sjúkratryggingar Íslands fyrir heilsugæslustöðvarnar á höfuðborgarsvæðinu, þar sem í ljós kom að notendur beri almennt mikið traust til heilsugæslunnar, eða 74% og alls 79% séu ánægðir með þjónustuna. Þá telji 90% viðmót og framkomu starfsfólksins vera gott.

Það sem vekur þó mesta athygli er það sem Svandís lætur ósagt látið um könnunina.

Í greininni virðist Svandís alveg gleyma að minnast á, að þær heilsugæslustöðvar sem nutu mests trausts í könnuninni, eru einkareknar. Alls fjórar af þeim fimm heilsugæslum sem nutu mesta traustsins eru einkareknar. Meðaleinkunn einkareknu stöðvanna í könnuninni var 4.09 en einkunn þeirra sem reknar eru af hinu opinbera var 3.91.

Það var líka annað sem Svandís gleymdi að minnast á.

Þátttakendur þuldu nefnilega upp þau atriði sem mætti bæta í þjónustunni. Nefndu flestir styttri biðtíma, aukið aðgengi að læknum í gegnum síma, og aukna rafræna þjónustu, en Svandís taldi það ekki eiga heima í grein sinni.

Svandís hefur barist hart gegn hugmyndum um frekari einkavæðingu í heilbrigðiskerfinu og vill þess í stað setja nægjanlegt fjármagn í opinbera kerfið, landsmönnum öllum til heilla. Hún hefur hinsvegar hlotið gagnrýni fyrir að setja hins vegar ekki nægjanlegt fjármagn í kerfið, með þeim afleiðingum meðal annars að biðlistar eftir liðskiptiaðgerðum hafa margfaldast. Í stað þess að semja við einkaaðila um aðgerðir, eru sjúklingar sendir til Svíþjóðar, en kostnaðurinn við það er sagður þriðjungi hærri en ef aðgerðirnar væri framkvæmdar hér á landi.

Sjá nánar: Einkareknar heilsugæslustöðvar njóta mesta traustsins hjá Íslendingum – Skora hærra en ríkisreknar