Orðið á götunni er að mikil reiði ríki meðal stuðningsmanna Samherja í garð Más Guðmundssonar Seðlabankastjóra, eftir að Hæstiréttur ógilti stjórnvaldssekt bankans upp á 15 milljónir í garð þessa stærsta útgerðarfélags landsins, sem hagnaðist um 14,4 milljarða árið 2017, fyrir meint brot á gjaldeyrislögum. Hefur Þorsteinn Már, forstjóri Samherja, látið hafa eftir sér að hann búist við því að Már endi á bak við lás og slá vegna málsins.

Einn lögfræðinga Samherja hefur vakið máls á því á opinberum vettvangi, að Már Guðmundsson hafi lagt mikið á sig til að koma í veg fyrir að mistök hans komi í ljós, sem innan sviga er sagður jafnvel vera ásetningur.

Þá segir lögfræðingurinn einnig að frændur okkar norðmenn hafi þann háttinn á, að banna stjórnvöldum að gefa í skyn sekt manna í þeim málum þar sem annað hvort hafi verið sýknað, eða mál látið falla niður.

Segir lögfræðingurinn að það væri óskandi að slíkt lagaákvæði væri til hér á landi.

Orðið á götunni er að fátt ætti að vera því til fyrirstöðu að slíkt lagaákvæði líti dagsins ljós á kjörtímabilinu.

Kunningsskapur Þorsteins Más og Kristjáns Þórs Júlíussonar sjávarútvegsráðherra, er ekkert leyndarmál. Kristján hefur farið í túra fyrir Samherja auk þess sem hann er fyrrum stjórnarformaður félagsins og stjórnarmaður. Sjálfur hefur Kristján viðurkennt að hafa þekkt Þorstein síðan þeir voru ungir menn.

Þar sem er vilji, þar er vegur.