Nú er komið á daginn að heildarkostnaðurinn við kaup og standsetningu á Hótel Sögu fyrir menntavísindasvið Háskóla Íslands og Félagsstofnun stúdenta er ekki 12,7 milljarðar heldur 15,7 milljarðar, samkvæmt frétt í Morgunblaðinu í morgun. Stafar þetta af því að í upphaflegum tölum var ekki tekið tillit til þess hlutar sem tilheyrir Félagsstofnun. Reiknað til núvirðis lætur nærri að þetta séu 18,5 milljarðar.
Þarna hefur opinberum fjármunum bersýnilega verið sóað á báðar hendur og því hljóta að vakna ýmsar spurningar. Hver ber ábyrgð á þessum fjáraustri? Voru þessar framkvæmdir í samræmi við reglur um opinberar framkvæmdir? Engin þarfagreining virðist hafa verið gerð. Er ekki nokkuð ljóst að óheimilt hlýtur að vera að ráðstafa milljörðum og jafnvel milljarðatugum í eina framkvæmd án þess að nákvæm þarfagreining hafi verið gerð?
Það er áhugavert að bera þennan óheyrilega fjáraustur ríkisins í Hótel Sögu saman við það þegar Verslunarskóli Íslands við Ofanleiti var reistur en hann var tekin í notkun fyrir næstum 40 árum. Húsið, sem mun vera um 8000 fermetrar að stærð, kostaði 375 milljónir á verðlagi í ársbyrjun 1988. Framreiknað til dagsins í dag eru þetta ríflega 2,5 milljarðar. Til samanburðar er Hótel Saga um 19 þúsund fermetrar. Verslunarskólinn er talinn vera í prýðilega góðu húsi sem hentar vel til kennslu og skólastarfs. Ef gætt hefði verið sömu ráðdeildar og hagsýni við að koma þaki yfir menntavísindasvið Háskóla Íslands á háskólasvæðinu má færa rök fyrir því að hægt hefði verið að reisa húsið fyrir sex milljarða. Hótel Saga kostar þrefalda þá fjárhæð og sér ekki fyrir endann á kostnaðinum vegna þess að framkvæmdum er ekki lokið.
Það verður að kalla eftir opinberri rannsókn á því hvernig í ósköpunum ráðist var í að sturta 18,5 milljörðum í að kaupa og breyta Bændahöllinni úr hóteli í skóla og stúdentaíbúðir. Það er svo kaldhæðin staðreynd að forsætisráðherra þeirrar ríkisstjórnar sem tók ákvörðun um þessa óráðsíu, Katrín Jakobsdóttir, hefur síðan verið valin til að gegna stjórnarformennsku Fasteigna Háskóla Íslands, félags sem heldur utan um þær fasteignir sem nýttar eru í þágu skólans.
Vel færi á því að forveri hennar í því hlutverki, Daði Már Kristófersson, fjármálaráðherra, kallaði eftir því að Ríkisendurskoðun rannsaki gaumgæfilega allt sem snýr að kaupunum á Hótel Sögu og framkvæmdunum sem nú eru komnar í 18,5 milljarða. Einhver staðar er pottur brotinn.
