Borgarstjórn tók fyrir í dag tillögu Framsóknar og Sjálfstæðisflokks um lækkun fasteignaskatta í Reykjavík. Meirihlutinn lagði fram bókun þar sem tillagan er kölluð óábyrg og ótímabær.

Meirihlutinn bendir á að fasteignaskattar séu næstlægstir í Reykjavík af öllum sveitarfélögum höfuðborgarsvæðisins. Ekki standi til að hækka álagningarhlutföll sem hafa verið óbreytt um árabil.

Eins bendir meirihlutinn á að horfa þurfi á heildarmyndina.

„Leikskólagjöld í Reykjavík eru þau lægstu af öllu höfuðborgarsvæðinu. Um 80% félagslegra íbúða á höfuðborgarsvæðinu eru í Reykjavík þótt fjöldi borgarbúa sé einungis um 56% af íbúum þess svæðis.

Tillögur Sjálfstæðisflokks og Framsóknarflokks á fundi borgarstjórnar í dag, um breytingu á álagningu fasteignagjalda til lækkunar um 2 milljarða kr. á ári, er að okkar mati bæði óábyrg og ótímabær.“

Til að setja þessa fjárhæð í samhengi bendir meirihlutinn á að 2 milljarðar séu nærri þeirri upphæð sem Reykjavíkurborg setur nú í NPA (notendastýrða persónulega aðstoð við fatlað fólk) og um einn þriðji af því sem frístundastarf borgarinnar kostar. Eins sé þetta hærri upphæð en það sem öll bókasöfn borgarinnar kosta.

„Nú er ekki rétti tíminn til að skerða þjónustu með lækkun fasteignaskatta. Nú er hins vegar tíminn til að mæta enn frekar framkvæmda- og þjónustuþörfum borgarbúa.“