Svarthöfði sat fyrir framan flatskjáinn í gærkvöld og horfði á línulega dagskrá Ríkisútvarpsins. Þar var svo sem fremur fátt um fína drætti, nema ef vera skyldi þáttur af Hringfaranum, sem ekki er örgrannt um að stofnunin hafi birt Svarthöfða áður – í viðtæki hans alla vega.

Skörulegur málflutningur Kristrúnar Frostadóttur í Kastljósþætti kvöldsins hélt þó fyrir Svarthöfða vöku í sófanum. Eftir því sem vikur hafa liðið á stóli forsætisráðherra hefur Kristrúnu vaxið fiskur um hrygg og nú svo komið að fáir atvinnustjórnmálamenn standast henni snúning. Varla var að finna snöggan blett á hennar framkomu þar og varðist hún fimlega og sótti fram á víxl.

Eitruðust var pillan hennar á stjórnarandstöðuna varðandi umræður í þinginu um veiðigjaldafrumvarpið. Eitt af því sem stjórnarandstaðan hefur veifað í því sambandi er að hækkun leigu fyrir afnot af fiskiauðlindinni sé skattahækkun.

Svarthöfði þykist kunna sitthvað fyrir sér í lögfræði og man ljóslega að eitt af því sem einkennir skatta er að þeir eru ekki frádráttarbær kostnaður í rekstrarreikningi og skilur hann ekki hvernig löglærðir menn í stjórnarandstöðu geta klifað á því að þessi hækkun leigu sé skattahækkun. Sé gjald frádráttarbært, er það ekki skattur.

Svarthöfða dugar þetta eina dæmi til að spyrja sig og aðra hvort furða sé að forsætisráðherrann nefni það að umfjöllun stjórnarandstöðunnar hafi verið í falsfréttastíl.

Svarthöfði er jafnframt gáttaður á að þetta Kastljósviðtal og sérílagi þetta ofangreinda atriði hafi valdið uppnámi meðal stjórnarandstöðunnar í gærkvöld og lengt málþóf á þeirra vegum í sal Alþingis inn í nóttina. Og sjálfsagt mun því haldið áfram í dag og næstu daga.

Í dag er 24. júní um land allt og stutt í að júlímánuður hefjist. Allir þátttakendur á vinnumarkaði eru löngu búnir að skipuleggja sitt sumarleyfi og gera ráðstafanir. Einhverjir eiga gistingu innanlands bókaða, aðrir á leið út fyrir landsteina og þannig má áfram telja. Sumarlokanir leikskóla sveitarfélaganna hefjast í júlí – fyrsta dag mánaðarins í mörgum þeirra.

Rask á starfsáætlun þingsins snertir ekki aðeins kjörna fulltrúa. Starfsmenn Alþingis skipta tugum og áform þeirra í sumar í algeru uppnámi.

Svarthöfði býr við þann munað að fátt getur raskað áformum hans um ráðstöfun kjarasamningsbundinna sumarleyfisdaga.

Hann þakkar guði sínum fyrir að þurfa ekki að eiga ekki undir málæði vinnufélaganna, sem dögum saman röfla um sömu atriðin – en bæta engu við. Og á meðan líður stutt íslenskt sumar hjá.