Það yrði mjög neikvætt fyrir hagvöxt í alþjóðahagkerfinu ef ríki tækju upp á því að draga úr tekjusköttum og leggja tolla á í staðinn til að afla tekna. Hindrunarlaus alþjóðaviðskipti stuðla að því að vörur séu framleiddar þar sem hagkvæmast er að framleiða þær. Vont væri ef við Íslendingar reyndum að framleiða bíla og avókadó hér á landi. Lilja Solveig Kro, hagfræðingur hjá Arion banka, er gestur Ólafs Arnarsonar í hlaðvarpi Markaðarins á Eyjunni.
Markadurinn - Lilja Solveig Kro - 4
„Svo veltur líka, bara eins og í Bandaríkjunum, eitthvað sem hefur ekki fengið mikla umræðu, en hvað á að gera við allar þessar tollatekjur? Það skiptir mjög miklu máli fyrir efnahagskerfið í Bandaríkjunum. Ef tollatekjurnar verða teknar og notaðar til að lækka skatta til neytenda þá vissulega eru neytendur að borga meira fyrir vörurnar í landinu en eru hins vegar að borga minni skatta þannig að þeir hafa meira milli handanna en ella. Ef tollatekjurnar verða hins vegar notaðar til að lækka ríkishallann þá geta áhrifin verið miklu meiri á bandaríska neytandann. Það er ýmislegt sem við eigum eftir að fá svör við,“ segir Lilja Solveig.
Ég sá það einhvers staðar að á 19. öldinni voru tollar nokkuð ráðandi í milliríkjaviðskiptum og mörg ríki notuðu tolla sem tekjuöflun en fóru síðan að taka upp tekjuskatta og þess háttar vegna þess að tekjurnar af tollunum dugðu ekki fyrir þeim útgjöldum sem ríkin stóðu frammi fyrir. Það er því mjög ólíklegt að tollar núna muni vega upp á móti einhverjum skattalækkunum, segjum í tekjuskattskerfinu.
„Þetta getur oltið á því hverjir hvatarnir eru og það yrði auðvitað mikil afturför ef ríki myndu leggja niður tekjuskattana og taka upp tolla í staðinn. Það hefur mikil áhrif á hagvöxt í heiminum að við séum að framleiða vörurnar þar sem er hagstæðast að framleiða þær, að við séum ekki hér á Íslandi að reyna að framleiða bíla og og avókadó og hvað sem er fyrir okkur. Við verðum að nýta hlutfallslega yfirburði landa til að framleiða vörur þar sem best er að framleiða þær,“ segir Lilja Solveig.
Einnig er hægt að hlusta á Spotify.
