Svarthöfði hefur gefið því gaum að svo virðist sem í tísku sé komið að nefna beinagrindur við öll möguleg og ómöguleg tækifæri. Nýafsagður ráðherra var sagður hafa stigið úr stóli sínum vegna þess sem nefnt var beinagrind.

Aldraður þingmaður Sjálfstæðisflokks dylgjaði með að fleiri beinagrindur ættu eftir að koma fram af hálfu þingmeirihlutans. Reyndar taldi þingmaðurinn að þær kæmu úr skottinu – sem telja verður nýstárlegan geymslustað beinagrinda.

Kjaftfor þáttastjórnandi fær sér í glas að viðstöddu fjölmenni á opinberum stað og lætur að því liggja að ráðherra í ríkisstjórninni hafi einhverju sinni átt einhvers konar hlutdeild í að byrla pólitískum andstæðingi ólyfjan og koma honum í annarlegar aðstæður sem mættu nýtast síðar til að koma höggi á þann hinn sama. Heila gallaríinu var svo útvarpað um hlaðvarp.

Allt virðist Svarthöfða þetta bera keim af stressi og svekkelsi vegna óáran innan raða þess flokks sem lengst hefur farið með völdin í landinu. Mikið af þessari tísku er svo birt á samfélagsmiðlinum Facebook sem í höndum þessara manna ætti frekar að vera kennt við annan líkamspart og óæðri.

Af þessu tilefni hugsaði Svarthöfði til þess sem stendur í hinni helgu bók á einum stað: „Hví sérð þú flísina í auga bróður þíns en tekur ekki eftir bjálkanum í auga þínu?“

Svarthöfði er viss um að víða leynast bjálkarnir og ekki sé farsælt að benda sífellt á flísar í annarra manna augum.