Þingmennirnir Sigurjón Þórðarson, Eydís Ásbjörnsdóttir og Eiríkur Björn Björgvinsson sitja í meirihluta atvinnuveganefndar og gera alvarlegar athugasemdir við málflutning framkvæmdastjóra Samtaka fyrirtækja í sjávarútvegi.
Heiðrún Lind Marteinsdóttir, framkvæmdastjóri SFS, skrifaði grein sem birtist á Vísi í gær þar sem hún sagði frumvarp um hækkun veiðigjalda ekki unnið með fullnægjandi hætti, byggja á röngum forsendum, röngum útreikningum og gagnrýndi hún skort á faglegri greiningu eða áhrifamati. Heiðrún fullyrti að boðað veiðigjald væri komið langt umfram það sem lagt var út með og af niðurstöðu skattsins sé ljóst að hækkunin muni ekki nema 7-8 milljörðum eins og atvinnuvegaráðherra haldi fram heldur 32 milljörðum.
Meirihluti atvinnuveganefndar hefur nú svarað Heiðrúnu og gerir alvarlegar athugasemdir við grein hennar. Þar beiti Heiðrún útúrsnúningnum og noti tölur sem frá upphafi var vitað að væru ónákvæmar og voru eins innherjaupplýsingar sem áttu aldrei að fara frá atvinnuveganefndinni.
Meirihlutinn telur rangfærslur Heiðrúnar alvarlegar og til þess fallnar að fóðra málflutning SFS um að veiðigjöld séu að hækka langt umfram það sem frumvarpið segi til um.
„Látið er að því liggja að útreikningar sem sýni þetta byggi á tölum frá Skattinum. Fyrir liggur, og hefur legið fyrir í marga daga, að þær tölur sem settar eru fram af meirihluta atvinnuveganefndar í nefndaráliti hans eru réttar tölur. Tölur sem minnihluti nefndarinnar setur fram í sínum álitum, og byggja á sama grunni og rangar tölur SFS, eru rangar.“
Þetta hafi fulltrúi Skattsins staðfest á fundi atvinnuveganefndar í morgun.
Heiðrún byggi málflutning sinn á aflatölum ársins 2023 í staðinn fyrir að nota þann kvóta sem úthlutað hefur verið, en að mati meirihlutans er þetta alvarlegur útúrsnúningur enda hafi árið 2023 verið mjög gott rekstrarár í sjávarútvegi út af mikilli loðnuveiði. Nánast engin loðna hafi veiðst í ár. Með þessu sé Heiðrún að blása upp ætluð áhrif veiðigjaldafrumvarpsins.
„Ef hún hefði miðað við réttan samanburð þá myndi reikningsdæmið hennar skila því, að teknu tilliti til áhrifa frítekjumarks, að veiðigjöld myndu hækka um 7 til 8 milljarða króna, líkt og atvinnuvegaráðherra sagði réttilega í ræðustól fyrr í mánuðinum.“
SFS tali eins um mat Skattsins og vísi þá í tölur sem komu fram á fundi atvinnuveganefndar þann 5. júní. Þá var talað um að veiðigjaldið yrði 64 krónur á hvert þorkígildikíló. Hins vegar var tekið skýrt fram á þessum fundi að ekki væru komnar fram upplýsingar frá Fiskistofu til að klára útreikningana. Því væri aðeins um vinnugögn að ræða. Eins var tekið fram að innherjaupplýsingar væri að ræða sem trúnaður þyrfti að ríkja um.
Síðar kom í ljós að þessar tölur skattsins byggðu að hluta á tölum yfir óslægðan afla en ekki slægðan eins og gera skuli þegar verið er að finna út verðmæti aflans. Réttir útreikningar hafi legið fyrir frá og með 10. júní og réttar tölur voru kynntar atvinnuveganefnd þann 12. júní.
„Hið rétta er að veiðigjaldið er að hækka mun minna á hvert þorskígildiskíló en SFS heldur fram. Þetta kom nær samstundis í ljós eftir umræddan fund, var leiðrétt og allir hlutaðeigandi sem koma að útreikningunum sendu frá sér sameiginlega tilkynningu þess efnis þann 16. júní, eða tveimur dögum áður en önnur umræða um veiðigjaldafrumvarpið hófst.
Samt kýs framkvæmdastjóri SFS að notast áfram við tölur sem hún veit að eru ekki þær réttu. Fleiri hafa gert þá framsetningu að sinni, innan og utan þings.
Það er alvarlegt.“
