Fjölmiðlar reyna að láta að því liggja að niðurstöður kosninganna liggi fyrir áður en kosningabaráttan er komin á fullt og frambjóðendur fá mismikil tækifæri til að kynna sig fyrir kjósendum. Arnar Þór Jónsson segir framboð sitt fara gegn þeirri valdablokk sem öllu stjórni á Íslandi og spyr hvaðan rödd gagnrýninnar hugsunar á að koma þegar stjórnmálaflokkarnir, fjölmiðlar og háskólarnir séu allir á opinberu framfæri. Arnar Þór er gestur Ólafs Arnarsonar í sjónvarpsþætti á Eyjunni í aðdragandi forsetakosninga. Þáttinn má nálgast hér á Eyjunni, á hringbraut.is og á Hringbrautarrás Sjónvarps Símans. Einnig má hlusta á hann sem hlaðvarp.

Hér er brot úr þættinum:

Eyjan - Arnar Þór - 1.mp4

„Ég tel að það sem við höfum verið að horfa á Íslandi á síðustu árum – þá er ég að hugsa um t.a.m. ríkisvæðingu stjórnmálaflokkanna, sem ég vil kalla svo því að þeir eru komnir á opinbert framfæri, fjölmiðlarnir eru komnir á opinbert framfæri, háskólarnir eru á opinberu framfæri – hvaðan á þetta aðhald að koma, hvaðan kemur rödd gagnrýninnar hugsunar ef hún á ekki að koma frá okkur borgurunum sjálfum ef okkur er umhugað um framtíð Íslands,“ segir Arnar Þór.

„Ef við viljum að börnin okkar og barnabörn fái að erfa landið, fái að njóta góðs af auðlindunum okkar, fái að eiga þess kost eins og ég núna að bjóða mig fram í frjálsum lýðræðislegum kosningum og neyta kosningaréttar í þeim mæli sem við viljum að það hafi þá áhrif, þá verðum við að standa vörð um þetta. Ég átta mig á því, Ólafur, að því sögðu, að ég er svolítið að fara gegn þessari valdablokk sem stýrir öllu á Íslandi og ég er ekki vinsæll meðal fjölmiðlanna.“

Hér er þátturinn í heild:

HB_EYJ106_NET_ArnarThor.mp4

Arnar Þór segir að sér hafi verið haldið utan fjölmiðlaljóssins nánast allan þann tíma sem liðinn er frá því  að hann lýsti yfir framboði í janúar. „Ég vil þakka þér fyrir að bjóða mér hingað. Það ber vott um það að þú viljir hleypa röddunum að og sinna þeirri skyldu þinni sem fjölmiðlamaður að hjálpa kjósendum að sjá hverjir það eru sem eru í framboði þannig að kjósendur geti myndað sér frjálsa skoðun.“

Hann segist vera að reyna að ná utan um þau vinnubrögð birst hafi í fjölmiðlum að undanförnu. „Fjölmiðlar láta að því liggja að kosningarnar séu í einhverjum skilningi útkljáðar áður en kosningabaráttan byrjar.“