Sólveig Anna Jónsdóttir formaður Eflingar hefur opinberað það á Facebook-síðu sinni að hún hafi mælt með framboði Steinunnar Ólínar Þorsteinsdóttur til embættis forseta Íslands.
Með skjáskoti af Island.is þar sem meðmælin eru staðfest skrifar Sólveig einfaldlega:
„Áfram Steinunn Ólína Þorsteinsdóttir.“
Það verður því ekki betur séð en að Sólveig styðji framboð Steinunnar Ólínu og ætli sér að greiða henni atkvæði sitt.
Steinunn Ólína hefur ekki lýst yfir framboði með formlegum hætti en hefur hafið söfnun meðmæla. Hún hefur greint frá því að hún sé að íhuga það alvarlega að bjóða sig fram og hefur lofað því að bjóði Katrín Jakobsdóttir forsætisráðherra sig fram muni hún gera það líka.
Vart kemur á óvart að Sólveig styðji framboð Steinunnar Ólínu en báðar hafa þær undanfarin ár haldið opinberlega á lofti sjónarmiðum í þjóðfélagsmálum sem telja verður að hallist nokkuð til vinstri.
