Svarthöfði veitti því eftirtekt að ný ríkisstjórn Bjarna Benediktssonar stillti sér upp til myndatöku við ríkisráðsborðið á Bessastöðum, líkt og aðrar ríkisstjórnir hafa gert allt frá lýðveldisstofnun. Telst það vart til tíðinda.
Eitthvað fannst samt Svarthöfða ljósmyndin, sem tekin var við þetta tækifæri, óvenjuleg. Á blaðamannafundinum í Hörpu í gærdag, þar sem ný ríkisstjórn var kynnt til sögunnar, stóðu formenn ríkisstjórnarflokkanna, talið frá hægri: Guðmundur Ingi Guðbrandsson, formaður VG, Bjarni Benediktsson, formaður Sjálfstæðisflokksins, og Sigurður Ingi Jóhannsson, formaður Framsóknar.
Þarna voru leiðtogar ríkisstjórnarflokkanna mættir. Eins og vera ber þegar ný ríkisstjórn er mynduð. Eða var það svo?
Á ríkisráðsfundum sitja leiðtogar ríkisstjórnarflokkanna jafnan næst forseta lýðveldisins. Forsætisráðherra situr forseta á hægri hönd og formaður hins stjórnarflokksins á vinstri. Séu flokkarnir í ríkisstjórn þrír situr formaður þriðja ríkisstjórnarflokksins á hægri hönd forsætisráðherra. Þannig var það síðast þegar Bjarni Benediktsson myndaði ríkisstjórn. Þá sat Benedikt Jóhannesson, þáverandi formaður Viðreisnar og fjármálaráðherra, forseta á vinstri hönd og Óttarr Proppe, formaður Bjartrar framtíðar, sat næstur Bjarna við ríkisráðsborðið.
Svarthöfði tók eftir því að sannarlega sátu Bjarni Benediktsson og Sigurður Ingi Jóhannsson næst forsetanum við ríkisráðsborðið. Bjarni á hægri hönd og Sigurður Ingi á vinstri. Hins vegar var formaður Vinstri grænna, Guðmundur Ingi Guðbrandsson, hvergi sjáanlegur við þann enda borðsins. Eftir nokkra leit fannst hann í þriðja sæti frá nýliðahorni ríkisráðsborðsins, sem raunar rúmar ekki lengur allan þann fjölda ráðherra sem þarf til að stýra Íslandi. Af er það sem áður var, þegar einungis þurfti sex ráðherra. Núna eru þeir tólf og komast ekki fyrir við ríkisráðsborðið.
Á hægri hönd forsætisráðherra sat hins vegar annar ráðherra Vinstri grænna. Svandís Svavarsdóttir sat í sætinu sem ætlað er formanni þriðja ríkisstjórnarflokksins.
Þessi uppstilling er skýrt merki um að Svandís er hinn raunverulegi formaður VG þrátt fyrir að Guðmundur Ingi sé í orði kveðnu starfandi flokksformaður. Lýðræðislegar stofnanir flokksins hafa ekki valið Svandísi til forystu en það skiptir litlu máli. Í Kreml er lýðræðið bara upp á punt.
Svarthöfði hefur hins vegar aldrei áður séð formlegan flokksformann ríkisstjórnarflokks á Íslandi settan svo niður við skör sem við þessa myndatöku við ríkisráðsborðið á Bessastöðum í gær. Nomenklatúran innan VG hefur hins vegar valið nýjan foringja. Eina spurningin sem eftir stendur er hvern þremilinn Guðmundur Ingi var að vilja á blaðamannafundinum í Hörpu í gær þar sem hann stillti sér upp ásamt Bjarna Benediktssyni og Sigurði Inga Jóhannssyni rétt eins og hann væri formaður í ríkisstjórnarflokki?
