Tónlistarmaðurinn Bubbi Morthens leggur orð í belg um forsetakosningarnar í aðsendri grein á Vísi. Hvetur hann forstjórann og rithöfundinn Ólaf Jóhann Ólafsson til þess að bjóða sig fram.

„Ólafur Jóhann Ólafsson er ekki bara snjall rithöfundur og farsæll sem stjórnandi í heimi skemmtiiðnaðarins í Ameríku heldur hefur hann alla helstu mannkosti sem prýða má forseta Íslands: Hann er hógvær, traustur, kurteis og kemur mjög vel fyrir,“ segir Bubbi í stuttri grein.

Fimm frambjóðendur hafa boðið sig fram til forseta Íslands og virðist Bubba ekki lítast nógu vel á þá heldur vill hann að Ólafur gefi kost á sér. Hann hafi marga kosti.

„Ólafur Jóhann er gríðarvel tengdur úti í heimi eftir að hafa verið í áratugi í forustu alþjóðlegra fyrirtækja eins og Sony og Time Warner, en hér heima er hann fyrst og fremst þekktur sem einn fremsti rithöfundur þjóðarinnar,“ segir Bubbi. „Ég tel að Ólafur Jóhann hafi alla þá kosti sem þarf til að vera forseti Íslands.“