Fjárhagsáætlun Reykjavíkurborgar fyrir árið 2025 var lögð fram í gær og fóru í kjölfarið fram oddvitaumræður í borgarstjórn. Hildur Björnsdóttir, oddviti Sjálfstæðisflokksins, beindi þar sjónum sínum meðal annars að rekstri skrifstofu borgarstjóra og vakti þar sérstaka athygli á liðunum Samskiptamál, markaðs- og viðburðamál, almannatengsl og auglýsingar. Benti hún á að á næsta ári muni þessir málaflokkar kosta borgarbúa tæpar 300 milljónir króna.

„Er þetta ekki dæmigerð birtingarmynd af þeirri forgangsröðun sem hefur einkennt stjórn Reykjavíkurborgar? Hér er opnunartími sundlauga skertur svo spara megi 24 milljónir árlega. Hér eru bókakaup til skólabókasafna skorin niður svo spara megi 10 milljónir árlega og hér á að skerða opnunartíma leikskólanna til að spara 10 milljónir. Þetta gera þau án þess að blikka en telja svo sjálfsagt að fleygja 300 milljónum í auglýsinga- og markaðsmál borgarstjóra“, sagði Hildur í ræðustóli.

Alls er gert ráð fyrir að 198 milljónir fari í samskiptamál, 97 milljónir í markaðs- og viðburðamál, 2,7 milljónir í almannatengsl og 1,6 milljónir í auglýsingar. Samtals 299,3 milljónir króna.

Sagði Hildur að fjárhæðin skyti skökku við þegar einu hagræðingaraðgerðir meirihlutans hafi snúið að skertri þjónustu við íbúa, en við blasi fjöldi vannýttra tækifæra til að skera niður í yfirbyggingunni. „Hvernig væri að tryggja hér gott úrval bóka fyrir íslensk grunnskólabörn og rúman opnunartíma sundlauga, en skera niður þennan grobbsjóð borgarstjóra? Þessi forgangsröðun er með ólíkindum“, sagði Hildur að lokum.