Ástrós Kristinsdóttir hefur verið ráðin markaðsstjóri Fastus ehf. Um síðastliðinn áramót sameinuðust Fastus, Expert, Expert kæling og GS Import í eitt félag. Hið sameinaða fyrirtæki ber heitið Fastus ehf., en starfsemi þess skiptist nú í tvö meginsvið; Fastus heilsu og Expert.
Hlutverk Ástrósar er að móta og leiða markaðsmál félagsins og endurmörkun þriggja vörumerkja auk stefnumótunar í kynningarmálum sem og innri og ytri markaðssetningu.
„Það er ákaflega spennandi að koma inn í nýtt starf sem er ekki fastmótað. Félagið á mikið inni í markaðsmálum og það er mitt hlutverk að leiða það verkefni farsællega.
Ég er virkilega árangursdrifin og legg mikinn kraft og metnað í þau verkefni sem að skipta mig máli. Mér finnst markaðssvið og fjármálasvið fyrirtækja almennt mega tala miklu meira saman. Það er mikilvægt að skilja rekstur fyrirtækja til að skila af sér arðbærum markaðsmálum. Það eru spennandi tímar fram undan hjá sameinuðu félagi og meginsviðum þess Fastus heilsu og Expert,“ segir Ástrós.
Ástrós hefur unnið við markaðsmál síðastliðin 5 ár. Síðast starfaði hún sem viðskiptastjóri hjá auglýsingastofunni Hér&Nú. Þar á undan var hún aðstoðarmaður Þórhalls Arnar Guðlaugssonar, Ph.D, prófessors við viðskiptafræðideild HÍ, og þar áður starfaði hún sem fjármálaráðgjafi hjá Arion banka. Ástrós er með B.Sc. gráðu í viðskiptafræði frá Háskóla Íslands og auk þess með verðbréfaréttindi.
Fastus er flutt í nýjar höfuðstöðvar að Höfðabakka 7 í Reykjavík en þar er verslun, sýningareldhús, skrifstofur, verkstæði og vörulagerar fyrir bæði svið, auk varahlutalagers, allt undir einu þaki.
