Hanna Katrín Friðriksson, þingflokksformaður Viðreisnar, segir mikil átök vera í gangi innan ríkisstjórnarinnar og ekki sé allt sem sýnist í þeim efnum. Hún segir Svandísi Svavarsdóttur halda á fjöreggi ríkisstjórnarinnar.

Hanna Katrín er viðmælandi Ólafs Arnarsonar í hlaðvarpi Markaðarins á Eyjunni þessa vikuna.

Markaðurinn - Hanna Katrín Friðriksson 3

Hanna Katrín telur að Svandís muni þurfa að bakka með hvalveiðibannið sem hún setti á með örskömmum fyrirvara í júní, en það segi hins vegar ekki alla söguna. Hún sé með ás uppi í erminni, sem sé vinna nefndarinnar um auðlindina okkar.

Svandís hafi nefnilega boðað breytingar í fiskveiðistjórninni og það geti jafnvel þýtt að hvalveiðibannið geti orðið banabiti ríkisstjórnarinnar. Ekki vegna þess að það sé svo stórt mál en vel kunni að fara svo að Sjálfstæðisflokkurinn noti hvalveiðibannið sem tylliástæðu til að rjúfa stjórnarsamstarfið vegna þess að það líti betur út en að flokkurinn stilli sér upp sem eini flokkurinn sem standi gegn því að afrakstrinum af auðlindinni verði deilt á sanngjarnari hátt en nú er.