Gíbraltar er breskt yfirráðasvæði á suðurströnd Íberíuskaga. Þar búa um 34.000 manns á tæplega 7 ferkílómetra svæði.
Ef úrslit kosninganna verða í samræmi við niðurstöður skoðanakannana þá getur farið svo að PP þurfi að leita til hægri flokksins Vox til að geta myndað meirihluta á þingi. Vox, sem er lítill hægri flokkur, hefur haft í hótunum um að loka landamærum Spánar og Gíbraltar ef hann kemst til valda að kosningum loknum.
Allt frá því að Bretar sögðu skilið við Evrópusambandið hafa þeir og Spánverjar reynt að ná saman um stöðu og framtíð Gíbraltar en það hefur ekki tekist fram að þessu. Nú hefur Vox fengið nóg og vill þvinga Breta til að láta undan kröfum Spánverja með því að loka landamærunum.
Samningaviðræðurnar sigldu í strand nýlega þegar ríkisstjórn sósíalista krafðist þess að fá lögsögu yfir flugvellinum á Gíbraltar.
Í kjölfar Brexit er Gíbraltar fræðilega séð utan tollabandalags ESB og því eiga reglurnar um frjálsa för fólks í raun ekki við. En til að koma í veg fyrir öngþveiti á svæðinu hafa spænsk stjórnvöld ekki gripið til þess ráðs að taka upp landamæraeftirlit eða loka landamærunum.
15.000 Spánverjar fara dag hvern til Gíbraltar til að vinna en þeir gegna mörgum mikilvægum störfum þar, til dæmis í heilbrigðiskerfinu. Þeir fá almennt hærri laun en þeir geta fengið á Spáni.
Breska ríkisstjórnin hefur sakað spænsku ríkisstjórnina um að setja óraunhæfar kröfur fram til að þvinga fram samning sem myndi í raun fela í sér að Gíbraltar verður innlimað í Schengensvæðið þar sem ekkert landamæraeftirlit er.
Deilur Spánverja og Breta um Gíbraltar eru ekki nýjar af nálinni. Þær má rekja allt aftur til 1704 og þegar enskar og hollenskar hersveitir hertóku svæðið. Samkvæmt Utrecht-sáttmálanum frá 1713 fengu Bretar opinberlega yfirráð yfir svæðinu en Spánverjar hafa alla tíð síðan krafist þess að fá svæðið aftur.
Gíbraltabúar kusu um framtíð svæðisins 1967 og 2002 og höfnuðu því að ganga Spánverjum á hönd. Gíbraltar fékk sjálfsstjórn 2006 en ríkisstjórnin í Lundúnum fer með utanríkismál og varnarmál svæðisins.
Áður fyrr var Gíbraltar mjög mikilvæg höfn fyrir breska flotann en í dag eru fjármálastarfsemi, flutningastarfsemi og ferðamennska aðaluppistaðan í atvinnulífinu.