Nú reyna lögmenn forsetans fyrrverandi að fá réttarhöldum yfir honum, fyrir að hafa geymt leyniskjöl á heimili sínu í Flórída, frestað þar til eftir forsetakosningarnar.
Ástæðan fyrir þessari baráttu er augljós því ef Trump sigrar í kosningunum í nóvember á næsta ári verður líklega ekkert úr réttarhöldum yfir honum því forsetinn nýtur friðhelgi á meðan hann er við völd. Og ef það nægir ekki þá hefur hann að margra mati völd til að náða sjálfan sig.
Lögmenn Trump sendu nýlega 12 síðna langa greinargerð til alríkisdómara, sem sér um málið varðandi leyniskjölin, þar sem þeir færa rök fyrir því að fresta eigi réttarhöldunum fram yfir kosningar en til stendur að þau hefjist í desember.
Lögmennirnir draga enga dul á að þeir muni gera sitt besta til að draga rannsóknina og málsmeðferðina á langinn.
Trump er ákærður fyrir að hafa tekið rúmlega 100 háleynileg skjöl með sér þegar hann lét af embætti forseta og að hafa flutt þau með sér til Flórída þar sem hann geymdi þau á heimili sínu. Meðal þessara skjala voru upplýsingar um kjarnorkuvopn Bandaríkjamanna og annarra ríkja. Veikleikar ef til stríðs kæmi og áætlanir um viðbrögð við kjarnorkuárás á Bandaríkin.
