Sex dómsmálaráðherrar Sjálfstæðisflokksins hafa undanfarin 10 ár borið ábyrgð á málefnum innflytjenda og í byrjun vikunnar tók sá sjöundi við. Því skýtur það skökku við þegar fjármálaráðherra, formaður flokksins, reynir að kenna minnihlutanum á Alþingi um að við Íslendingar skulum hafa algjörlega misst tökin á þessum málum.

Þorsteinn Pálsson setur fram alvarlega gagnrýni á Sjálfstæðisflokkinn í vikulegum pistli sínum á Eyjunni, Af kögunarhóli, í dag.

Hann segir stærsta flokkinn í þremur ríkisstjórnum og með ábyrgð á innflytjendamálum allan tímann vissulega mega nota stór orð um lausatök. Hitt lýsi veruleikaflótta að skrifa þau á minnihlutann á Alþingi.

Þorsteinn dregur fram að Jón Gunnarsson, fráfarandi dómsmálaráðherra, segir skýrum orðum að vandi Sjálfstæðisflokksins sé samstarfið við VG. Auk útlendingamála og lögreglumála sé um vandamál að ræða í öryggis- og orkumálum.

Hann rifjar einnig upp orð Guðmundar Inga Guðbrandssonar, varaformanns VG, á síðasta ári um að hlutverk VG í ríkisstjórn væri ekki síst fólgið í því að stöðva hugmyndafræði Sjálfstæðisflokksins.

Af þessu megi sjá að stjórnarsamstarfið byggist ekki á málamiðlunum heldur gagnkvæmu neitunarvaldi.

Þorsteinn bendir á að Sjálfstæðisflokkurinn hafi valið VG sem besta kostinn til samstarfs eftir síðustu kosningar, ólíkt því sem var eftir kosningarnar 2017 þegar útilokað var að mynda stjórn nema með VG. Síðast hafi sjálfstæðismenn kosið að starfa áfram með VG þrátt fyrir að hægt hefði verið að mynda annars konar ríkisstjórn sem staðið hefði nær grundvallarhugmyndum þeirra í ríkisfjármálum, öryggis- og varnarmálum, orkumálum og útlendingamálum.

Þetta segir Þorsteinn vera pólitíska tilveruklípu sem þingflokkur sjálfstæðismanna sé í þegar hann mætir fólkinu í landinu. Tilraun fjármálaráðherra til að þvo hendur sínar af vandræðum í útlendingamálum beini sjálfkrafa sjónum manna að sömu afleiðingum stjórnarsamstarfsins á mörgum öðrum sviðum þótt ætlunin sé að draga athyglina frá þeim ógöngum.

Pistil Þorsteins í heild má lesa hér.