Það hefur vakið athygli margra að flestir keppinautar hans um að verða forsetaframbjóðandi Repúblikanaflokksins á næsta ári hafa ekki notað ákæruna til að ráðast á Trump. Þeir hafa þvert á móti gagnrýnt hana og lýst yfir áhyggjum sínum af henni og sagt að hún geti valdið enn meiri og dýpri klofningi meðal bandarísku þjóðarinnar en nú er.
Jørn Brøndal, prófessor í bandarískri sögu við Syddansk háskólann í Danmörku, sagði í samtali við Danska ríkisútvarpið að ákveðin ástæða sé fyrir þessu. „Þeir eru hræddir við að styggja kjarna kjósenda Repúblikanaflokksins,“ sagði hann.
Það voru alríkisyfirvöld sem gáfu ákæruna út en því fer fjarri að allir Repúblikanar séu sáttir við þá ákvörðun dómsmálaráðuneytisins að ákæra forsetann fyrrverandi. Kevin McCarthy, formaður fulltrúadeildar þingsins, sagði það „óverjandi“ að ákæra Trump.
Ron DeSantis, ríkisstjóri í Flórída, sækist eftir að verða forsetaframbjóðandi Repúblikana en hann er ósáttur við ákæruna og sagði það vera ógn við frjálst samfélag að reyna að nota alríkisyfirvöld sem vopn.
Trump hefur sótt hart að DeSantis að undanförnu og segir hann ófæran um að gegna embætti forseta. Samt sem áður segist DeSantis ósáttur við ákæruna.
Jørn Brøndal sagði að eins og fleiri frambjóðendur sé DeSantis hræddur við viðbrögð stórs hluta af kjarnakjósendum Repúblikanaflokksins sem styðja Trump. Ef fólk taki afstöðu gegn Trump eigi það á hættu að vera ýtt út úr flokknum.
