Orkan sem á dögunum tók í gagnið fyrstu færanlegu hraðhleðslustöðvar landsins setur nú enn frekari orku í að efla þjónustuna og nútímavæða svo koma megi til móts við mismunandi þarfir fjölbreyttra viðskiptavina fyrirtæksins. Orkan sem er með 72 stöðvar víðsvegar um landið hefur bætt við nýjum greiðslumöguleika á öllum dælum stöðvanna, nú geta viðskiptavinir notað Netgíró til að greiða fyrir þann orkugjafa sem þeir kjósa að kaupa. Eins geta þeir notað Netgíró til að greiða fyrir rúðuvökva úr svo til gerðum dælum sem staðsettar eru á stöðvunum.

„Það er okkar markmið að gefa viðskiptavinum tækifæri á að nýta sér þær greiðslulausnir sem henta hverju sinni.  Við höfum fengið fyrirspurnir um möguleika á þessari greiðsluleið frá viðskiptavinum beggja fyrirtækja og er innleiðing á Netgíró á Orkustöðvum því viðbótarþjónusta sem við erum stolt af að geta boðið upp á. Lausnin virkar á öllum dælum og því er hægt að kaupa eldsneyti, rafmagn og einnig rúðuvökva. Samstarfið við Netgíró hefur gengið einstaklega vel og gott að geta boðið viðskiptavinum upp á þessa greiðsluleið,“ segir Auður Daníelsdóttir, forstjóri Orkunnar.

Tíu ár eru síðan Netgíró kom fram á sjónarsviðið og var þá fyrsta íslenska greiðslulausnin sem fór ekki í gegnum erlend greiðslumiðlunarkerfi. Lausnin er sjálfstætt íslenskt kerfi sem fór og fer enn í gegnum Reiknistofu bankanna og þaðan beint í heimabankann hjá viðskiptavinum.

„Ég hef sagt það áður að Netgíró var líklega aðeins á undan sinni samtíð, en í sífellt breytilegu umhverfi höfum við náð að sýna fram á að þetta viðskiptamódel okkar og greiðslulausnin sem slík, á heima bæði í nútíð og framtíð. Samstarfið við Orkuna er skref í rétta átt fyrir bæði fyrirtækin og viðskiptavini þeirra. Markmið beggja fyrirtækja er að efla viðskiptavini á sem einfaldastan máta og það er einmitt það sem við erum að gera,“ segir Helgi Björn Kristinsson, forstöðumaður Netgíró.