Fyrr í dag var birt á vef Alþingis svar Þórdísar Kolbrúnar Reykfjörð Gylfadóttur fjármála- og efnahagsráðherra við spurningum Loga Más Einarssonar þingmanns Samfylkingarinnar um ríkiseignir. Ráðherrann svaraði spurningunum ekki og segir í svari sínu að þær séu svo viðamiklar að ekki sé hægt að svara þeim í stuttu máli.

Spurningar Loga voru þessar:

„Hversu margar nýbyggingar hafa verið byggðar á vegum ríkisins og fyrirtækja þess undanfarin 20 ár? Svar óskast sundurliðað eftir sveitarfélagi, ári, stærð, tegund húsnæðis, byggingarstigi, því hvenær hafist var handa og byggingarkostnaði.“

„Hver var fjöldi bygginga ríkisins ár hvert á fyrrnefndu tímabili, sundurliðað eftir sveitarfélögum?“

„Hver var fjöldi fermetra ríkiseigna ár hvert á fyrrnefndu tímabili, sundurliðað eftir  sveitarfélögum?“

„Hvaða upphæð var greidd í fasteignagjöld af ríkiseignum ár hvert á fyrrnefndu tímabili, sundurliðað eftir sveitarfélögum?“

Í svari ráðherrans segir að í lögum um þingsköp Alþingis komi fram að þingmaður geti óskað upplýsinga frá ráðherra eða svars um opinbert málefni eða einstakt atriði með þingfyrirspurn. Í lögunum komi jafnframt fram að fyrirspurn skuli vera skýr, um afmörkuð atriði og mál sem ráðherra ber ábyrgð á og sé við það miðað að hægt sé að svara henni í stuttu máli.

Þannig sé gert ráð fyrir að skrifleg svör séu að jafnaði ekki lengri en svo að þau megi lesa á fimm til tíu mínútum. Þá beri að hafa í huga að samkvæmt þingskapalögum sé ráðherrum settur þröngur tímafrestur, 15 virkir dagar, til að svara skriflegum fyrirspurnum.

Efni fyrirspurnarinnar sé svo viðamikið að ekki sé hægt að svara henni með einföldum hætti og í stuttu máli enda sé verið að kalla eftir ítarlegum upplýsingum yfir 20 ára tímabil sem sundurliða þurfi eftir stöðu í hverju sveitarfélagi fyrir sig. Til að hægt sé að ná utan um þær upplýsingar þurfi að fara yfir öll skilamöt sem gefin hafa verið út vegna einstakra framkvæmda á vegum ríkisins undanfarin 20 ár. Þá þurfi jafnframt að kalla eftir sértækum upplýsingum frá öllum félögum í ríkiseigu yfir sama tímabil.

Fjármála- og efnahagsráðuneytið búi ekki yfir miðlægum upplýsingum um einstakar framkvæmdir félaga í eigu ríkisins. Því sé ljóst að ekki sé hægt að svara fyrirspurninni í stuttu máli í samræmi við 57. grein laga um þingsköp Alþingis.