Staksteinahöfundur Morgunblaðsins skýtur föstum skotum á RÚV í pistli dagsins. Þar skrifar höfundur um mál ljósmyndara RÚV sem var nappaður við að reyna að komast inn í hús í Grindavík í vikunni.

Ekki er nóg með umbrotin í Grindavík og rýmingu bæjarins að fyrirskipan hins opinbera, heldur bætast við innbrot, einnig að undirlagi hins opinbera. Upp komst um strákinn Tuma, ljósmyndara Ríkisútvarpsins (Rúv.), sem öryggismyndavél sýndi reyna að komast inn í mannlaust hús, róta eftir lyklum og fikta við útidyrahurðina. Eftir að hafa farið í heimildarleysi inn á bannsvæði og fljúga dróna vítt og breitt án leyfis.“

Sjá einnig: Ljósmyndari RÚV stígur fram – „Mér líður bara ömurlega yfir þessu“

Staksteinahöfundur spyr hvað ljósmyndaranum gekk eiginlega til.

„Hélt hann að Páll Steingrímsson skipstjóri ætti heima þarna?! Margir hafa með réttu hneykslast á framferði ljósmyndarans, en þeir ættu að hafa hugfast að svívirðan við stuldinn á síma kapteinsins og innbrotið í hann var hálfu alvarlegra vegna þess að þar var brotið fullframið.“

Þá gefur staksteinahöfundur lítið fyrir útskýringar Heiðars Arnar Sigurfinnssonar, fréttastjóra RÚV.

„Yfirlýsing Heiðars Arnar Sigurfinnssonar fréttastjóra Rúv. gerði málið ekki minna furðulegt, en hann bar við „misskilningi og óðagoti“, án þess að játa ábyrgð sína eða ætla nokkrum ábyrgð. Eru einhver skilyrði í starfsmannastefnu fréttastofu Rúv.? Þar virðast byrlun, skattsvik, ástvinahygli, viðtaka þýfis, dreifing einkagagna og nú innbrot a.m.k. engin fyrirstaða,“ segir staksteinahöfundur sem beinir svo orðum sínum að útvarpsstjóra.

„Líður Stefáni Eiríkssyni, útvarpsstjóra og fv. lögreglustjóra, bara vel með það?“