Lífeyrissjóðirnir munu vinna með sjóðsfélögum sem ekki geta staðið í skilum með afborganir lána sinna hjá sjóðunum af völdum náttúruhamfaranna á Reykjanesi og finna úrræði við hæfi hvers og eins.

Stjórn Landssamtaka lífeyrissjóða sendi í morgun frá sér tilkynningu með hvatningu til sjóðfélaga sem ekki geta staðið í skilum með afborganir af sjóðfélagalánum vegna tekjufalls af völdum náttúruhamfara á Reykjanesi um að leita til sinna lífeyrissjóða og fá upplýsingar um þau úrræði sem þeim kunni að standa til boða.

Í tilkynningunni segir m.a.: „Lífeyrissjóðir hafa áður brugðist við efnahagslegum áföllum með því að aðstoða sjóðfélaga sína á erfiðleikatímum. Nægir að vísa til viðbragða vegna COVID-faraldursins og þar áður efnahagshrunsins.

Stjórn Landssamtaka lífeyrissjóða sendir Grindvíkingum hlýjar kveðjur á erfiðleika- og óvissutímum. Hugur okkar er hjá þeim sem óvænt lentu í umfangsmiklum og skyndilegum erfiðleikum vegna hamfara náttúrunnar.“

Í samtali við Eyjuna segir Þórey S. Þórðardóttir, framkvæmdastjóri Landssamtaka lífeyrissjóða, að hver sjóður setji sér sínar reglur varðandi aðstæður sem þessar en almenna reglan sé að reynt sé að horfa á hvert tilvik fyrir sig og finna lausn sem hentar viðkomandi. Í Covid og hruninu hafi t.d. lenging lána og greiðslufrestur verið meðal úrræða sem í boði voru.