Covid hafði hrikaleg áhrif á skrifstofuhótelið Regus, sem var í raun eins og hótel og þurfti næstum að loka starfsemi sinni í faraldrinum. Tómas Ragnarz, forstjóri Regus, segir að Covid hafi verið dýrasti skóli sem hann hefur gengið í gegnum, en að lærdómurinn hafi verið mikill. Aldrei hefur gengið betur en núna. Tómas er gestur Ólafs Arnarsonar í hlaðvarpi Markaðarins á Eyjunni.
Markaðurinn - Tómas Ragnarz - 3
„Við fundum hrikalega fyrir Covid. Það var ekkert ósvipað hjá okkur og hótelunum. Við nánast lokuðum,“ segir Tómas. „Við gátum hvorki starfað þarna né haft opið. Okkur voru settar hömlur varðandi það hve margir gætu verið í húsnæðinu. En við fórum í gegnum þetta með okkar leigusala og ber að þakka honum fyrir það. Það var bara sest niður og sagt: Hvernig förum við í gegnum þetta? Við vissum að þetta myndi taka enda. Þetta var erfitt. Lærdómsríkt en erfitt, dýrt, ánægjulegt.“
Hann segir að það góða sem kom út úr þessu hafi verið að Covid hafi kennt okkur að hægt sé að gera hlutina öðruvísi en við höfum alltaf gert þá. „Andvökunæturnar voru margar og þetta er dýrasti skóli sem ég hef farið í gegnum en mjög lærdómsríkur í alla staði.“
Tómas segir að Covid hafi haft góð áhrif þegar upp er staðið
„Það sem kom út úr þessu Covid, þótt maður hafi bölvað því þegar stóð yfir, en með hjálp góðs fólks, ég er það heppinn að ég átti góða aðila sem stóðu við hliðina á mér, bæði núverandi og fyrrverandi starfsfólk og góðir vinir og við komumst í gegnum þetta. Og reksturinn hefur aldrei verið eins góður og í dag. Ekki frá því að við byrjuðum, 2014. Reksturinn hefur aldrei verið jafn heilbrigður, aldrei jafn stöðugur, innkoman hefur aldrei verið jafn mikil, nýtingin aldrei jafngóð. Það góða sem kom út úr þessu er að fólk lærði að vinna öðruvísi.“
Hann segist telja að Covid hafi gert fólk að einhverju leyti frjálsara í vinnu. „Það opnaðist þarna gat sem atvinnurekendur. Meira að segja gamlir atvinnurekendur, gamlir fauskar, sáðu að þetta var hægt. Við gátum leyft fólkinu að vinna hvar sem er. Sumir voru bara þannig að þeir sögðu: Við viljum bara fá fólkið okkar á skrifstofuna, sjá fólkið okkar vinna. Við erum búin að leysa það. Fólkið stimplar sig bara inn hjá okkur.
Þetta er búið að kenna okkur mjög margt á mjög skömmum tíma og ég held að þetta sé búið að hjálpa mörgum fyrirtækjum: Vinnan datt ekkert niður, heldur steig fólk bara inn +i aðstæðurnar, stóð upp og gerði meira ef eitthvað er.
Þetta fór frá því í febrúar 2020 að ég man eftir að á Bylgjunni í febrúar 2020 voru mannauðsstjórar að segja að fólk ætti bara að slökkva á símanum þegar það kemur heim og yfirmenn mættu ekki senda tölvupóst eftir klukkan fjögur. Þetta hefur breyst.“
