Komin er upp keppni milli kvenráðherranna í ríkisstjórninni um það hver þeirra hafi mestan kjark til að beita ráðherravaldi sínu án þess að spyrja kóng eða prest.

Þetta skrifar Jón Viðar Jónsson í nýrri færslu sem hann birti á Facebook-síðu sinni undir yfirskriftinni „Spegill, spegill, herm þú mér …“ um kl. 16 í dag.

„Fyrst ríður Þórdís Kolbrún á vaðið og slítur stjórnmálasambandi okkar við Rússland og virðist ekki hafa rætt um það við nokkurn mann, amk ekki helstu diplómata þjóðarinnar. Enda eru sérfræðingar og fagmenn í augum íslenskra pólitíkusa bara til þess að setja opinberan stimpil á það sem þeir hafa þegar ákveðið.

Og nú birtist Svandís Svavars og getur allt í einu leyft sér það sem hún þorði ekki fyrir nokkurn mun fyrr i sumar, eins og við öll munum. Hún vísaði þá í lög, og stundi vandræðalega og talaði rósamál, en nú er sem sé allt annað uppi á teningnum þótt enginn hafi frétt af lagabreytingum. Óli Björn og Sigurður Ingi eru að vonum afar óhressir og tala um brot á góðum stjórnsýsluháttum,“ skrifar Jón Viðar.

Hann spyr: „Hvað næst?“

Hann rifjar upp að ekki sé langt síðan Lilja Alfreðsdóttir „sýndi heldur betur klærnar“ með því að skipa þjóðminjavörð á auglýsingar og fékk fordæmingu alls fræðasamfélagsins. Hann minnist þess ekki að Sigurður Ingi hafi haft neitt um þá stjórnsýslu að segja.

Um fimmtán mínútum eftir að færslan birtist hvarf hún og virðist hafa verið eytt. Eyjan náði skjámynd af henni.