Ástráður Haraldsson, settur ríkissáttasemjari í deilu SA og Eflingar, sakar Stefán Ólafsson, sérfræðing hjá Eflingu, um trúnaðarbrot og jafnvel lögbrot, vegna framgöngu Stefáns á Facebook í dag, en þar tjáði hann sig fjálglega um innihald sáttafundar deiluaðila í gærkvöld. Ástráður hafði gefið út þau fyrirmæli að innihald fundarins mætti ekki ræða opinberlega og hafa bæði framkvæmdastjóri SA og formaður Eflingar hafnað viðtölum um málið.

Frá þessu er greint á Bylgjunni og Vísi í dag. Stefán sagði í Facebook-færslu í dag að aðeins hefði borið þúsundkalli á milli deiluaðila. Ástráður segir þetta rangt. Skrif Stefáns voru eftirfarandi:

AURASÁLIN

Í gærkvöld varði samninganefnd Eflingar hátt í 5 klst. í bið eftir því hvort samninganefnd atvinnurekenda (SA) myndi leyfa settum sáttasemjara að leggja fram svokallaða miðlunartillögu í deilu Eflingar og SA.

Biðin var árangurslaus.

Við dagslok var það mér umhugsunarefni, hversu lengi fólk sem hefur milljónir í laun á mánuði getur rætt um eitt þúsund króna launahækkun til verkafólks – og það án árangurs!

Aurasálin er vissulega verðugt rannsóknarefni fyrir sálfræðinga!

„Þetta bara má ekki gerast“

Ástráður var harðorður í viðtali við Bylgjuna um málið: „Ég hafði beðið aðilana sérstaklega um að vera ekki að tjá sig opinberlega eða veita viðtöl vegna þeirrar viðkvæmu stöðu sem uppi er í deilunni. Í öðru lagi þá er það svo að samkvæmt lögunum um stéttarfélög og vinnudeilur er beinlínis óheimilt að greina opinberlega frá eða bera vitni um það sem kann að hafa komið fram á samningafundum, nema með heimild gagnaðilans, með samþykki beggja samningaðila,“ segir Ástráður í viðtali við Bylgjuna, en samkvæmt þessu er athæfi Stefáns ólöglegt.

Ástráður segir jafnframt að það sem sé kannski verst í málinu sé það að frásögn Stefáns sé ekki rétt:

„Svo er það í þriðja lagi, sem er kannski verst, að þessi frásögn Stefáns Ólafssonar er einfaldlega ekki rétt.“ – Var þá Ástráður spurður hvort munaði meiru en þessum þúsundkalli sem Stefán nefnir og svaraði Ástráður:

„Það er bara þannig að samhengi hlutanna er miklu flóknara heldur en að hægt sé að taka út einhvern einn þátt og segja „það munar akkúrat þessu“. Það eru margir þættir sem þurfa að spila saman. En ég ætla ekki að gera það sama og Stefán að fara að bera hér einhver vitni um það sem gerist á samningafundum. Þetta bara má ekki gerast og þetta er vís vegur til að hleypa þessari deilu endanlega út af teinunum ef menn  ætla að fara þessa leið.“