Fréttablaðið skýrir frá þessu í dag. Fram kemur að afkoma stærstu sveitarfélaganna það sem af er ári sé verri en áætlanir gerðu ráð fyrir. Mest munar þar um hallarekstur borgarinnar en rekstrarniðurstaða A-hluta var neikvæð um tæplega níu milljarða.
Að mati stjórnenda er verðbólgan meginskýringin á slæmri afkomu sveitarfélaganna. Einnig hefur launakostnaður hækkað og stöðugildum fjölgað vegna aukinn krafna í málaflokki fatlaðra.
Ef ekkert breytist verða mörg sveitarfélög að grípa til róttækra aðgerða og niðurskurðar.
Fréttablaðið hefur eftir Heiðu Björg Hilmisdóttur, formanni Sambands íslenskra sveitarfélaga, að þungt hljóð sé í sveitarstjórnarfólki um allt land vegna stöðunnar. „Þessi niðurstaða segir okkur að við höfum ekki mikinn tíma til stefnu. Við þurfum að setjast niður með ríkinu og ákveða hvernig við ætlum að tryggja nauðsynlega þjónustu sem sveitarfélögum ber að veita lögum samkvæmt,“ sagði hún.
Hún sagðist telja að tími stöðugreininga sé liðinn. „Við vitum öll að framlög ríkisins til mikilvægra málaflokka, eins og þjónustu við fatlað fólk, duga ekki fyrir raunkostnaði. Það er búið að kortleggja þá stöðu og við vitum öll hvert vandamálið er. Nú þurfum við að fylgja því eftir og leysa þetta saman,“ sagði hún.
