Þetta er innihald greinar sem William Barr, sem var dómsmálaráðherra í forsetatíð Donald Trump, skrifaði í New York Post.
„Hann býr ekki yfir þeim hæfileikum sem þarf til að vinna breiðan og endingargóðan sigur, sem ég tel nauðsynlegt til að endurreisa Bandaríkin,“ skrifar Barr.
Barr var dómsmálaráðherra í forsetatíð Trump en lét af embætti í desember 2020, skömmu eftir að Trump tapaði fyrir Joe Biden í forsetakosningunum.
Ráðuneyti Barr fann engar sannanir fyrir staðhæfingum Trump um að rangt hefði verið haft við í kosningunum en það er lygi sem Trump heldur enn fram.
Aðeins er rúm vika síðan Trump tilkynnti að hann sækist eftir að verða forsetaframbjóðandi flokksins 2024.
Nú stígur Barr fram á sjónarsviðið og tekur afstöðu gegn Trump. Hann segir að meðal þeirra sem hafa verið nefndir sem hugsanlegir forsetaframbjóðendur flokksins þá sé Trump sá sem er ólíklegastur til að geta sameinað flokkinn og sá sem líklegast er að tapi kosningunum.
Hann hrósar Trump fyrir árangur hans í einstökum málum í forsetatíð hans en eins og áður segir telur hann Trump ekki geta náð árangri í næstu kosningum. Ef flokknum eigi að takast að ná Hvíta húsinu aftur þá þurfi frambjóðanda sem höfði til millistéttarinnar í úthverfunum, verkamanna og klassískra íhaldsmanna.
Hann segir einnig að vilji Trump til að eyðileggja flokkinn, ef hann fær ekki sínu framgengt, byggist ekki á prinsippum heldur á sjálfsást hans. Hún geri að verkum að hann geti ekki hugsað um stjórnmálaflokk sem annað en framlengingu á honum sjálfum.
