Guðmundur Ingi Þóroddsson, formaður Afstöðu, gefur kost á sér í þriðja sæti Samfylkingarinnar í Reykjavík fyrir komandi sveitastjórnarkosningar.

Í Facebookhópnum Stuðningsfólk Guðmundar Inga, sem var stofnaður í aðdraganda alþingiskosninganna þar sem hann gaf upphaflega kost á sér áður en vafi taldist leika á kjörgengi hans, segir Guðmundur Ingi:

„Það var á Nýársdag sem ég sá fyrst þættina ÆÐI í sjónvarpinu þar sem þrír ungir strákar, Bassi, Binni og Patrekur eru í aðalhlutverkum. Mér fannst mikið til koma og ég hreifst af hispursleysi þeirra og framtakssemi. Þeir segja það sem þeir hugsa og gera það sem það þeir vilja. Eitthvað ræddu þeir strákarnir um stjórnmál og sagðist Binni vera vinstri maður en Patrekur beygist til hægri, eða þar til hann áttaði sig á því fyrir hvað Sjálfstæðisflokkurinn stendur í raun og veru. Eftir að hafa „kynnst“ þessum eðaldrengjum, með hámhorfi, þá hugsaði ég með mér hversu dásamlegt það hefði nú verið ef ég hefði haft þeirra gildi, þeirra þor og dugnað á sama aldri. Eftir síðasta þáttinn ákvað ég að liggja ekki lengur undir feldi, taka strákana í ÆÐI mér til fyrirmyndar og kýla á ákvörðun.

Að þessu sögðu hef ég ákveðið að bjóða Samfylkingunni krafta mína að nýju og nú fyrir sveitarstjórnarkosningarnar í Reykjavík í vor. Ég geri mér von um góða niðurstöðu í prófkjörinu og hef ákveðið að stefna á þriðja sæti listans.“

Hann segir ennfremur: „Ég tel mig eiga góðan möguleika á þriðja sætinu enda er ávallt þörf fyrir endurnýjun í stjórnmálum, að fá fram sjónarhorn annarra og ég mun koma fram með nýja vinkla. Flestir þekkja stöðu mína í málefnum jaðarsettra og minnihlutahópa en auk þess mun ég standa með smærri fyrirtækjum og úthverfum borgarinnar enda breiðhyltingur nú, uppalinn í árbænum og Fylkismaður. Nánar er hægt að lesa um helstu stefnumál mín á heimasíðunni www.gudmunduringi.is“

Þar kemur fram að hans helstu áherslumál snýist um smærri fyrirtæti, jaðarsetta hópa, úthverfin og nýja vinkla á æskulýðs- og forvarnarstarf.

Fyrr í dag tilkynnti Skúli Helgason borgafulltrúi að hann sæktist eftir þriðja sætinu.