Vefmiðillinn Kjarninn birti í morgun spá fyrir komandi kosningar þar sem metnar voru líkur einstakra frambjóðenda á að ná inn á þing. Um afar áhugaverða samantekt er að ræða sem miðillinn vinnur í samstarfi við stærðfræðinginn Dr. Baldur Héðinsson.
Hægt er að kynna sér forsendurnar á bak við spánna á vef Kjarnans en DV tók saman líkur nokkurra þjóðþekktra þingmanna eða frambjóðenda á því að komast inn á þing eftir rúma viku. Ljóst er að margir þjóðþekktir stjórnmálamenn gætu dottið útaf þingi í komandi kosningum.
Óhætt er að fullyrða að Sigmundur Davíð Gunnlaugsson hafi rekið eina af eftirtektarverðustu kosningabaráttunum. Hann hefur verið á ferð og flugi um landið að tala við kjósendur, úða í sig hakki og leika sér við hunda. Á milli kosningafunda þar sem hann fer yfir útfærslurnar á metnaðarfullum kosningaloforðum Miðflokksins þá gefur hann sér líka tíma til að ræða um eina af ástríðum sínum í lífinu, Star Wars.
Ætla mætti að Sigmundur Davíð væri nánast öruggur inn á þing en þó metur spálíkanið líkur hans „aðeins“ um 64%. Miðflokksforinginn má því ekki við því að stíga nein feilspor á lokametrunum.
Ásmundur Einar Daðason sýndi mikið hugrekki með því að skipta um kjördæmi og bjóða sig fram í Reykjavík, þar sem Framsóknarflokkurinn hefur átt erfitt uppdráttar undanfarnar kosningar. Margir töldu hreinlega að um fífldirfsku væri að ræða þrátt fyrir að Ásmundur Einar hafi átt býsna gott kjörtímabil í ráðherrastóli og breytt ásýnd sinni verulega til hins betra. Miðað við spálíkan Kjarnans og Baldurs virðist sú áhætta ætla að borga sig því líkurnar á því að Ásmundur nái endurkjöri eru 72%
Brynjar Níelsson var hundfúll með árangur sinn í prófkjöri Sjálfstæðisflokksins í Reykjavík fyrr á árinu og ætlaði að hætta í pólitík. Hann ákvað svo að hætta við að hætta eftir margar áskoranir og framundan er spennandi kosninganótt þar sem örlög hans munu ráðast. 45% líkur eru taldar á því að Brynjar nái inn á þing og því eru miklar líkur á því að Brynjari verði hreinlega gert að hætta á þingi.
Allar líkur eru á því að Gunnar Smári Egilsson og Sósíalistaflokkurinn verði einn af sigurvegurum kosninganna. Gunnar Smári hefur farið mikinn undanfarnar vikur og skammar kapítalista í gríð og erg. Þá virðast ásakanir um að hann sigli undir fölsku flaggi sem sósíalisti ekki bíta á forstjórann fyrrverandi. Líkurnar á að Gunnar Smári endi á þingi eru metnar 61%.
Ökuþórinn Ásmundur Friðriksson þurfti að sætta sig við rýra uppskeru í prófkjöri Sjálfstæðismanna á dögunum og ljóst að það er verulega tvísýnt hvort að hann nái inn á þing. Líkurnar á því eru aðeins 39% samkvæmt spálíkaninu og því má gera ráð fyrir því að Ásmundur sé að hendast um kjördæmið sem aldrei fyrr í atkvæðaleit.
Rósa Brynjólfsdóttir sagði sig úr ríkisstjórn Vinstri grænna út af samstarfinu við Sjálfstæðismenn og gekk síðar til liðs við Samfylkinguna. Hún náði ágætis árangri í prófkjöri nýja flokksins og er núna í baráttusæti til að ná aftur inn á þing. Líkurnar eru akkúrat 50% og því verður mikil spenna í hennar herbúðum á kosninganótt.
Sömu sögu er að segja af tveimur öðrum sitjandi þingmönnum, Óla Birni Kárasyni og Bergþóri Ólasyni. Líkur þeirra á endurkjöri eru 50% og 51% þannig þeir sjá fram á mikla spennu.
Fáir hafa auglýst meira en Inga Sæland og hennar fólk í Flokki fólksins fyrir þessar kosnoingar. Óvíst er hvort að það skili karókíunnandanum inn á þing en líkur Ingu á endurkjöri eru aðeins metnar 30%. Búast má við senum á lokametrunum eins og Inga er þekkt fyrir.
Það vakti talsverða athygli þegar Guðmundur Gunnarsson hætti með látum sem bæjarstjóri á Ísafirði og hann var talinn hvalreki þegar hann gekk til liðs við Viðreisn. Eins og staðan er núna þarf hann þó að spýta verulega í lófana til að detta inn á þing því líkurnar eru aðeins 41%.