Fram kemur í nýrri skýrslu Vörðu, rannsóknarstofnunarstofnunar vinnumarkaðarins, að átta af hverjum tíu manneskjum með fötlun eigi erfitt með að ná endum saman. Þá kemur einnig fram að langflest þeirra hafi þurft að neita sér um heilbrigðisþjónustu vegna kostnaðar.
Jóhann Páll Jóhannsson fjallar um þetta í pistli sem hann skrifaði en pistillinn birtist í dag á Vísi. Þar segir Jóhann að þetta ástand bitni ekki síst á börnum sem eiga fatlaða foreldra. „Fjögur af hverjum tíu með fötlun eiga ekki fyrir nauðsynlegum fatnaði á börnin sín, þriðjungur getur ekki keypt nógu næringarríkan mat handa börnunum og þrjú af hverjum tíu hafa ekki efni á skipulögðum tómstundum,“ segir Jóhann í pistlinum.
„Þetta eru sláandi niðurstöður og áfellisdómur yfir þeim stjórnmálaflokkum og ráðherrum sem hafa farið með málefni barna og málefni öryrkja og fatlaðs fólks undanfarin ár, á kjörtímabili þar sem bilið milli örorkulífeyris og lægstu launa á vinnumarkaði hefur breikkað ár frá ári og frítekjumark öryrkja vegna atvinnutekna staðið í stað.“
Jóhann skýtur þá fast á Ásmund Einar, félags- og barnamálaráðherra. „Kannski segir það sitt að Ásmundur Einar félags- og barnamálaráðherra treysti sér ekki til að mæta í Kastljós í gær og svara fyrir það sem fram kemur í skýrslunni,“ segir Jóhann.
„Hann veit upp á sig skömmina. Í öllum PR-sirkúsnum í kringum málefni barna er eins og Ásmundur hafi gleymt því að fatlað fólk á líka börn – og það versta sem hægt er að gera þessum börnum er að skilja þau og foreldra þeirra eftir í fátækt.“
Að lokum segir hann að á næsta kjörtímabili þurfi að stöðva kjaragliðnunina og bæta kjör þeirra sem hafa setið eftir á undanförnum árum. „Um þetta verður kosið þann 25. september.“
Ekki náðist í Ásmund Einar við vinnslu fréttarinnar.