Dularfullur póstur hefur borist Reykvíkingum seinustu daga þar sem fólk er hvatt til að kjósa Sósíalistaflokkinn. Í bréfinu sem laumað er inn um lúgu íbúa segir að öllum stjórnmálaflokkum sé „drull um þig“ og er Sjálfstæðisflokkurinn helsta skotmark bréfsins.

„Þótt þú slökkvir á sjónvarpinu í öllum dagskrárhléum og smellir leiftursnöggt á „skip ad“ á undan öllum Youtube-myndböndum sem þú horfir á blasa við þér brosandi smetti úti í strætóskýli sem skella orðum framan í þig eins og „frelsi“ og „tækifæri“,“ segir meðal annars í bréfinu.

Þá er fólk beðið um að kjósa Sósíalistaflokkinn til að koma núverandi ríkisstjórn í burtu og sagt að flokkurinn sé sá eini sem getur stöðvað Sjálfstæðisflokkinn, Framsóknarflokkinn og Vinstri græna.

Í samtali við DV segir Gunnar Smári Egilsson, stofnandi Sósíalistaflokksins og formaður framkvæmdastjórnar flokksins, að bréfið sé ekki frá flokknum sjálfum. Líklegast er um að ræða dyggan aðdáanda sem vill hvetja samlanda sína í að kjósa flokkinn.

Höfundur bréfsins fer um víðan völl og talar meðal annars um raunveruleika þáttinn „Íslensk stjórnmál“ og segir að „Þorsteinn Már og fjölskylda noti tíbeskt fjallageitasmjör á Namibíuhumarinn sinn“.