Jón Magnússon, hæstaréttarlögmaður og fyrrum þingmaður Sjálfstæðisflokksins, gagnrýnir afstöðu Bjarna Benediktssonar, formanns Sjálfstæðisflokksins, og Áslaugar Örnu dómsmálaráðherra til innflytjenda í pistil á vefsíðu sinni.
„Í fyrradag að okkar tíma sprungu þrjár bílsprengjur við stúlknaskóla í Kabúl höfuðborg Afganistan. Sprengjunum var þannig fyrirkomið og tímastilltar, að þær gætu drepið sem flestar skólastúlkur. Fyrsta sprengjan sprakk við skólann og stúlkurnar og kennarar þustu út á götu en þá sprungu tvær til viðbótar allt gert til að drepa sem flestar,“ skrifar Jón en hann segir öfgafulla Íslamista bera ábyrgð á morðunum.
Jón vill meina að ástæðan á bakvið morðin sé tryllingsleg mannvonska og að Íslamistarnir hafi ekki viljað að stelpurnar öfluðu sér menntunar.
„Íslam er í dag og hefur verið lengi, seinfærasta barnið í bekknum hvað varðar viðurkenningu staðreynda, mannréttindi og menningu. Þannig var það ekki alltaf, en þannig er það í dag. Enn og aftur lögðu Bandaríkjamenn út í hernað í fjarlægu landi nú í Afganistan og fórnuðu mannslífum og gríðarlegum fjármunum til að breyta siðum fjarlægrar þjóðar. Það tókst ekki,“ skrifar Jón en hann segir þessa seinfæru nemendur koma til vesturlanda með hugmyndafræði og glæpi á borð við heiðursmorð, hryðjuverk og kvenfyrirlitningu.
Jón segir marga stjórnmálamenn á vesturlöndum hafa sett dulur fyrir bæði augun og neiti að horfast í augu við staðreyndir.
„Samt sem áður hefur bráð af mörgum í seinni tíð t.d. Macron, Frakklandsforseta og dönskum Sósíaldemókrötum, sem láta alla vega svo, sem þeir vilji bregðast við af skynsemi. Á sama tíma erum við, öndvert við aðrar Evrópuþjóðir, að búa til farveg til að fá sem flesta af þessum seinfærustu nemendum til okkar. Mér er óskiljanlegt, að að dómsmálaráðherra og formaður Sjálfstæðisflokksins skuli hafa gerst sérstakir talsmenn þessarar glópsku og dómsmálaráðherra skuli í ræðu og riti berjast fyrir því, að sem allra fyrst skuli skipt um þjóð í landinu,“ segir Jón að lokum.