Jens Stoltenberg, framkvæmdastjóri NATO, sagði í gær að aðvörunarljós blikki þessa stundina vegna framferðis Kínverja og Rússa. Hann sagði að það hafi ekki farið framhjá NATO að Kínverjar séu að efla her sinn til muna þessi misserin.

Hann sagði að valdajafnvægið í heiminum væri að breytast, ekki síst vegna þess hversu mikið Kínverjar séu að styrkja sig á hernaðarsviðinu. „Við sjáum þá í Afríku, á norðurheimskautasvæðinu, og við sjáum Kína reyna að ná stjórn á mikilvægum innviðum í Evrópu,“ sagði hann á fréttamannafundi í danska utanríkisráðuneytinu i gær.

Hann sagði að ógnirnar, sem steðja að Vesturlöndum, fari vaxandi. Einræðisstjórnir eflist í sífellu og láti meira að sér kveða.

Hann sagði að ógnirnar séu meðal annars í netheimum og að Kínverjar hafi sett mikið fé í þróun nýrra vopna.

Hann sagði samstarfið við Rússa einnig vera erfitt því landið sé sífellt að troða á nágrannaríkjum sínum og að samband NATO við Rússa hafi ekki verið eins slæmt og það er nú frá lokum kalda stríðsins.