Hildur Björnsdóttir, borgarfulltrúi Sjálfstæðisflokksins, ítrekar kröfur sínar um fullar afléttingar á sóttvarnatakmörkunum. Núverandi takmarkanir eru í gildi fram á miðvikudag. Þórólfur Guðnason sóttvarnalæknir hefur sagt að möguleikarnir í stöðunni séu þrír, að halda óbreyttum takmörkunum, aflétta að hluta eða aflétta af öllu.

Nokkrir tugir Covid-smita eru nú greind daglega en alvarleg veikindi af sjúkdómnum eru fátíð enda mikill meirihluti þjóðarinnar bólusettur fyrir Covid-19.

Í nokkuð hæðnisfulltri grein sem Hildur birtir í Fréttablaðinu í dag bendir hún á að lífið sjálft sé hættulegt. Árlega látist yfir 10 þúsund manns í Bandaríkjunum við að falla fram úr rúminu sínu. Þá rekur Hildur töluleg dæmi um hættuna við að látast í slysum og af völdum hryðjuverka. Síðan segir hún:

„Íslendingum hefur gengið vel í baráttunni við kórónaveiruna, þó margir hafi sannarlega farið illa úr faraldrinum. Nú þegar 90% fullorðinna eru bólusettir er kórónaveirusmit ekki stærsta ógnin við líf og heilsu manna. Þegar fólk er daglega áminnt um yfirvofandi hættu með reglulega uppfærðum smittölum skynjar það hugsanlega meiri ógn en ástæða er til. Hætturnar eru allt um kring og þær algengustu fáum við sjaldnast fréttir af.“

Hildur segir að það sé lífshættulegt að vera þátttakandi í lífinu og öll deyjum við á endanum. Hún krefst afléttinga strax:

„Það er lífshættulegt að vera þátttakandi í lífinu. Öll munum við óhjákvæmilega deyja. Við megum hins vegar ekki vera svo óttaslegin við dauðann að við látum lífið fara fram hjá okkur.

Afléttingar strax.“