Brynjar Níelsson, þingmaður Sjálfstæðisflokksins, datt útaf þingi á síðustu stundu í nótt. Hann virðist taka tíðindunum með jafnaðargeði ef eitthvað er að marka færslu hans á Facebook-síðu sinni en þar baunar hann á rétttrúnaðarþenkjandi Twitter-lið og Sósíalista í lokakveðju sinni til stuðningsmanna og vina.
„Jæja, nú er þessi rödd að þagna. Þó fyrr hefði verið segja kannski margir. Sá smá bros á milli ekkasoganna hjá vinum mínum í sósíalistaflokknum þegar ljóst var að ég var úti. Niðurstaðan var ekkert sérstök fyrr Sjálfstæðisflokkinn. Kannski má hann samt vel við una eftir að hafa verið í ríkisstjórn samfleytt í rúm átta ár,“ skrifar Brynjar.
Að hans mati er það merkilegasta við kosningaúrslitin að þeir stjórnarandstöðuflokkar, sem kalla sig frjálslynd umbótaöfl og tala gjarnan fyrir hönd þjóðarinnar, guldu afhroð.
„Við vitum núna að Twitter liðið, sem er uppfullt af pólitískri rétthugsun og ímyndaðri góðmennsku, er ekki að tala fyrir hönd þjóðarinnar. Þessi ágæta þjóð er ekkert að hugsa um nýja stjórnarskrá, allra síst þessa frá stjórnlagaráði. Hún er heldur ekki á þeirri vegferð að kollvarpa fiskveiðistjórnunarkerfinu eða að gera alla að ríkisstarfsmönnum. Þjóðin er að hugsa um hag sinn og velferð og er ekki í sömu sýndarmennsku og stjórnmálamenn. Vil nota tækifærið og óska landsmönnum til hamingju með kosningarnar,“ skrifar Brynjar.
Hann segist ekki vita hvað taki við hjá sér. Lífið haldi áfram og framtíð þjóðarinnar standi ekki né falli með honum.
„Ég vil þakka fyrir þann tíma sem ég fékk til að starfa fyrir ykkur öll. Það gaf mér mikið. Auðvitað voru ekki allir ánægðir með mig frekar en aðra. En ég reyndi að vera heiðarlegur við ykkur, tjáði mínar skoðanir umbúðalaust og sagði öðrum til syndanna og tók við skömmum, eins og vera ber. Kannski full truntulegur á köflum. En ég er þokkalega ljúfur maður inn við beinið og þægilegur í samstarfi. Það vita það bara ekki allir.“