Könnunin var gerð af MMR í samvinnu við Morgunblaðið og mbl.is. Miðað við niðurstöðurnar myndu níu flokkar fá þingmenn kjörna í kosningunum í haust en þrír þeirra eru rétt ofan við 5% þröskuldinn og því þarf ekki mikið að breytast til að þeir fái ekki þingmenn kjörna.
Könnunin sýnir að staða Sigmundar Davíðs Gunnlaugssonar, formanns Miðflokksins, er ekki eins sterk og áður en hann myndi ekki ná kjöri sem kjördæmakjörinn þingmaður fyrir Norðausturkjördæmi en næði kjöri sem uppbótarþingmaður kjördæmisins. Katrín Jakobsdóttir, forsætisráðherra, yrði eini þingmaður Vinstri grænna í Reykjavík norður en í Reykjavík suður myndu Svandís Svavarsdóttir og Orri Páll Jóhannsson ná kjöri fyrir flokkinn sem kjördæmakjörnir þingmenn.
Núverandi ríkisstjórn myndi halda meirihluta með 33 þingmenn þrátt fyrir að Vinstri græn tapi fjórum þingmönnum frá síðustu kosningum. Á móti kemur að bæði Sjálfstæðisflokkur og Framsóknarflokkur bæta við sig einum þingmanni.
