„Vegna frétta um skýrslu borgarskjalavarðar sem kynnt var á fundi borgarráðs í morgun vill Reykjavíkurborg koma eftirfarandi á framfæri. Ábendingar í skýrslu borgarskjalavarðar eru samhljóða skýrslu innri endurskoðanda um Nauthólsveg 100. Þegar hefur verið brugðist við niðurstöðum og ábendingum skýrslunnar. Vinnu við innleiðingu er annað hvort lokið, stendur yfir eða er í viðeigandi ferli,“

segir í tilkynningu frá Reykjavíkurborg vegna skýrslu Borgarskjalasafns Reykjavíkurborgar um braggamálið, sem ratað hefur í fréttir dagsins.

Sjá nánar: Sjáðu það sem almenningur mátti ekki sjá – Afhjúpandi tölvupóstar Reykjavíkurborgar

Sjá nánar: Einbeittur brotavilji starfsmanna Reykjavíkurborgar – Viðurlögin allt að þriggja ára fangelsi

Sjá nánar: Krefst afsagnar Dags í kjölfar kolsvartrar skýrslu – „Hrein og klár hylming á opinberum gögnum“

Breytingar til hins betra

Er greint frá því í tilkynningunni að ákveðin skref hafi þegar verið tekin til að bregðast við málinu:

1. Hafin er innleiðing nýs og öflugs upplýsingastjórnunarkerfis sem leysir af hólmi eldra skjalakerfi sem var í notkun á þeim tíma er skýrslan nær til.
2. Sett hefur verið sérstakt fjármagn á fjárfestingaráætlun til að minnsta kosti næstu fimm ára í átak í skjala- og upplýsingastjórnun.
3. Á síðasta ári urðu umtalsverðar breytingar á skipulagi borgarinnar sem bæði skýra, skerpa og útvíkka umboð þjónustu- og nýsköpunarsviðs varðandi skjalastýringu hjá stofnunum borgarinnar.
4. Skjalamál hafa verið færð inn í nýstofnaða gagnaþjónustu borgarinnar sem gefur þeim enn frekara vægi en áður og undirstrikar mikilvægi skjala sem gagna.
5. Borgarskjalasafn tilheyrir nú þjónustu- og nýsköpunarsviði sem styttir boðleiðir og gerir safninu kleift að hafa bein áhrif á högun skjalastýringar þar sem borgarskjalavörður á nú sæti í framkvæmdastjórn sviðsins.

Skýrslan birt

Tengill á skýrslu Borgarskjalasafnsins er einnig birtur í tilkynningunni:

„Því hefur verið brugðist við skýrslu borgarskjalavarðar með viðeigandi hætti. Skýrslan og umsögn þjónustu- og nýsköpunarsviðs er aðgengileg á vef Reykjavíkurborgar.“

https://reykjavik.is/frettir/vegna-skyrslu-borgarskjalavardar