Ef Lilja Alfreðsdóttir, mennta – og menningarmálaráðherra hefði fengið að ráða einhverju í ráðningarferlinu þegar nýr útvarpsstjóri var valinn, hefði hún ekki haldið leynd yfir umsækjendum líkt og gert var, né neitað að rökstyðja valið á Stefáni líkt og RÚV gerði. Þetta kemur fram í svari hennar við fyrirspurn mbl.is:

„Ráðning í stöðu út­varps­stjóra ligg­ur al­farið á borði stjórn­ar RÚV sem er kos­in af Alþingi Íslend­inga. Það hef­ur þegar komið fram í þessu máli að ég hefði kosið fullt gagn­sæi í ráðning­ar­ferl­inu öllu og það á líka við um ákvörðun stjórn­ar að rök­styðja ekki,“

seg­ir Lilja og ljóst að traustið milli Lilju og stjórnar RÚV er í lægri kantinum.

Fela sig á bak við ohf

Sem kunnugt er hefur stjórn RÚV neitað að rökstyðja val sitt á Stefáni Eiríkssyni, en bæði Kristín Þorsteinsdóttir, fyrrverandi ritstjóri Fréttablaðsins, og Kolbrún Halldórsdóttir, fyrrverandi þingmaður VG, sem báðar sóttu um starfið,  hafa kallað eftir slíkum rökstuðningi.

Var beiðni Kristínar synjað. Var vísað til þess að RÚV félli ekki undir lög um opinbera starfsmenn, þar sem það væri opinbert hlutafélag og því yrði beiðni Kristínar, um hvers vegna Stefán hefði verið tekin fram yfir hana, synjað.

Fyrirspurn Kolbrúnar hafði ekki borist til stjórnar RÚV, en gera má ráð fyrir að henni verði einnig synjað, en Kolbrún íhugar að kæra RÚV fyrir kærunefnd jafnréttismála.

Sjá einnig: Kolbrún íhugar að kæra ráðningu útvarpsstjóra – „Það er eðlilegt að ég skoði það“