Heilsumiðstöðin í Ármúla, sem meðal annars rekur sjúkradvöl á Hótel Íslandi, hefur ítrekað boðist til að létta álagi af Landspítalanum með því að taka við fleiri sjúklingum þaðan. Engin formleg svör hafa borist við þessu boði, hvorki frá Sjúkratryggingum Íslands né Landspítalanum.

Fréttablaðið skýrir frá þessu í dag. Haft er eftir Ásdísi Höllu Bragadóttur, framkvæmdastjóra Heilsumiðstöðvarinnar, að hótelið sé nú þegar með rammasamning við Sjúkratryggingar Íslands og því ætti ekki að vera flókið að útvíkka samstarfið nú þegar neyðarástandi hefur verið lýst yfir á spítalanum.

„Samningurinn er í gildi og í raun er ekkert því til fyrirstöðu að taka á móti fleirum og allt er til staðar ef áhugi er fyrir hendi,“

er haft eftir henni. Hún sagði jafnframt að reglulega sé tekið vel í þessa tillögu en engin endanleg afgreiðsla hafi fengist. Um 135 herbergi standa auð á hótelinu að hennar sögn.

Anna Sigrún Baldursdóttir, aðstoðarmaður forstjóra Landspítalans, sagði í svari við fyrirspurn Fréttablaðsins að reglulega berist hugmyndir og tillögur um hvernig sé hægt að létta álagi af spítalanum. Þessum tillögum sé vísað til heilbrigðisráðuneytisins sem, ásamt Sjúkratryggingum Íslands, sjái um gerð samninga um þjónustu utan spítalans.